പടിഞ്ഞാറത്തറ: പടിഞ്ഞാറത്തറ- ചെതലോട്ട് കുന്ന് റോഡ് പാടെ തകര്‍ന്നിട്ടും നന്നാക്കാന്‍ നടപടിയില്ലന്ന് പരാതി. കഴിഞ്ഞ ശക്തമായ മഴയ്ക്ക് ടാറിംഗ് ചെയ്ത ഭാഗങ്ങള്‍ ഭൂരിഭാഗവും ഒലിച്ചു പോയിട്ടും അറ്റകുറ്റ പണികള്‍ നടത്താനോ ഗതാഗതം സുഗമമാക്കാനോ അധികൃതര്‍ ഇതുവരെയും തയ്യാറായിട്ടില്ലന്നാണ് നാട്ടുകാര്‍ പറയുന്നത്.
നിലവില്‍ കാല്‍നട യാത്രക്ക് പോലും അസാധ്യമായ വിധം തകര്‍ന്നിരിക്കയാണ്. പടിഞ്ഞാറത്തറ പഞ്ചായത്തിന് കീഴിലുള്ള റോഡാണിത്. റോഡില്‍ ഡ്രൈനേജ് ഇല്ലാത്തതാണ് റോഡ് ഇത്തരത്തില്‍ പൂര്‍ണമായും തകരാന്‍ കാരണം. മഴ പെയ്യുന്നതോടെ വെള്ളം റോഡില്‍ കെട്ടികിടക്കുന്നതിനാല്‍ വന്‍ ഗര്‍ത്തം രൂപപ്പെടുകയും ടാറിങ് പൂര്‍ണമായും കുത്തിയൊലിച്ച് പോവുകയുമാണ് ചെയ്യുന്നത്. പുഞ്ചവയല്‍ ആദിവാസി കോളനികളിയിലേക്കും ചെതലോട്ട്കുന്ന് കോളനിയിലേക്കും കൂടാതെ വാരാമ്പറ്റയിലേക്കും നിരവധി ആളുകള്‍ ദിനംപ്രതി ആശ്രയിക്കുന്ന റോഡാണ് ഇത്തരത്തില്‍ ഗതാഗത യോഗ്യമല്ലാതായിട്ടും അധികൃതര്‍ അനങ്ങാപ്പാറ നയം സ്വീകരിച്ചിരിക്കുന്നത്. വിദ്യാര്‍ഥികളുള്‍പ്പടെ നിരവധി യാത്രക്കാരും ദിനംപ്രതി ഈ റോഡിനെ ആശ്രയിച്ചാണ് സഞ്ചരിക്കുന്നത്.
റോഡിന്റെ ശോച്യാവസ്ഥ കാരണം പടിഞ്ഞാറത്തറ ടൗണില്‍ നിന്നും ടാക്‌സികള്‍ സര്‍വീസിനായി വിളിച്ചാല്‍ പോലും ഈ റോഡിലൂടെയുള്ള സര്‍വീസിന് മടിക്കുന്ന സംഭവങ്ങളും നിരവധിയാണ്. ഇത് ചികിത്സക്കായി പോകുന്ന പ്രായം ചെന്ന രോഗികളുള്‍പ്പടെയുള്ളവരെ ഏറെ പ്രയാസത്തിലാക്കുന്നതാണ് നാട്ടുകാര്‍ പറയുന്നത്. കല്ലുകള്‍ ഇളകി കിടക്കുന്നതിനാല്‍ ഇരുചക്രവാഹനങ്ങള്‍ ഉള്‍പ്പെടെ അപകടത്തില്‍പെടുന്നതും നിത്യ സംഭവമായിരിക്കയാണ്.
കുത്തനെ ഇറക്കവും കയറ്റവും ഉള്ള റോഡില്‍ ഇത്തരത്തില്‍ ടാറിങ് ചെയ്ത ഭാഗങ്ങള്‍ മഴയില്‍ ഒഴുകിയിട്ടും അധികൃതരുടെ അനങ്ങാപ്പാറ നയം സ്വീകരിക്കുന്നതിനെതിരെ ശക്തമായ സമര പരിപാടികളുമായി മുന്നോട്ടു പോവാന്‍ തയാറാവുകയാണ് പ്രദേശത്തുകാര്‍.