തിരുവനന്തപുരം: നിയോജക മണ്ഡലം ഭാരവാഹികളെ നിശ്ചയിക്കാനായി തെരഞ്ഞെടുപ്പ് നടത്തിയെങ്കിലും വിജയികളെ പ്രഖ്യാപിക്കാനാകാതെ ബി.ജെ.പി കുഴങ്ങുന്നു.
തെരഞ്ഞെടുപ്പില്‍ കൂടുതല്‍ വോട്ടുകിട്ടി വിജയിച്ചാല്‍പോലും മറ്റു പല മാനദണ്ഡങ്ങളുടെ അടിസ്ഥാനത്തിലാണ് മണ്ഡലം പ്രസിഡന്റിനെ നിശ്ചയിക്കുന്നത് എന്നതിനാല്‍ വി.മുരളീധരന്റെയും പി.കെ.കൃഷ്ണദാസിന്റെയും നേതൃത്വത്തിലുള്ള ഗ്രൂപ്പുകള്‍ തമ്മില്‍ ശക്തമായ വടംവലിയാണ് നടക്കുന്നത്.
മണ്ഡലം പ്രസിഡന്റുമാരെ പ്രഖ്യാപിച്ചുകഴിഞ്ഞാല്‍ ജില്ലാ പ്രസിഡന്റുമാരെ തെരഞ്ഞെടുക്കുന്നത് ഏറെ ക്ലേശകരമാകുമെന്നു കണ്ടാണ് പ്രഖ്യാപനം നീളുന്നത്.
അതുകൊണ്ട് ജില്ലാ പ്രസിഡന്റുമാരെ ഉടന്‍ പ്രഖ്യാപിക്കാനാണ് സാധ്യത.
അതിനു ശേഷമേ മണ്ഡലം പ്രസിഡന്റുമാരെ പ്രഖ്യാപിക്കുന്നതിലേക്ക് പോകൂ.
മണ്ഡലം ഭാരവാഹികളെ ഭാരവാഹികളുടെ തെരഞ്ഞെടുപ്പ് നടന്നതിന്റെ ഫലം 24ന് പ്രഖ്യാപിക്കുമെന്നാണ് പറഞ്ഞിരുന്നതെങ്കിലും തര്‍ക്കങ്ങളെ തുടര്‍ന്നു മാറ്റുകയായിരുന്നു.
ജനുവരി അഞ്ചിനു മുമ്പ് സംസ്ഥാന പ്രസിഡന്റിനെ പ്രഖ്യാപിക്കേണ്ടതിനാല്‍ അതിനു മുമ്പേ ജില്ലാ, മണ്ഡലം പ്രസിഡന്റുമാരെ പ്രഖ്യാപിക്കേണ്ടതുണ്ട്.