വടകര: ചോമ്പാല്‍ പൊലിസ് സ്റ്റേഷന്റെ പിന്‍ഭാഗത്തെ ശുചിമുറിക്ക് സമീപം മാലിന്യം കൊണ്ടിട്ട സ്ഥലത്ത് ഉഗ്രശേഷിയുള്ള സ്‌ഫോടനം. ഇന്നലെ രാവിലെ 10.40 ഓടെയാണ് ഉഗ്ര ശബ്ദത്തോടെ സ്‌ഫോടനം നടന്നത്.  ഇതിനെ തുടര്‍ന്ന് ശുചിമുറിയോട് ചേര്‍ന്നുള്ള തൊണ്ടിമുതല്‍ സൂക്ഷിക്കുന്ന മുറിക്ക് സമീപം വലിയ കുഴി പ്രത്യക്ഷപ്പെട്ടു. കൂടാതെ മുറിയുടെ മേല്‍ഭാഗത്തെ ഭീം തകര്‍ന്ന് അപകടാവസ്ഥയിലായി. ഗ്രില്‍സ് പൊട്ടി, സ്റ്റേഷന്റെ പിന്‍ഭാഗത്തെ മതിലിന് വിള്ളല്‍ സംഭവിച്ചു. സ്റ്റേഷന്‍ കെട്ടിടത്തിന്റെ താഴത്തെ നിലയില്‍ പ്രവര്‍ത്തിക്കുന്ന അഴിയൂര്‍ കൃഷിഭവന്റെ ജനല്‍ ചില്ലുകള്‍ തകരുകയും പിന്‍ഭാഗത്ത് കൂട്ടിയിട്ട മാലിന്യത്തിന് തീപിടിക്കുകയും ചെയ്തു.
ശുചിമുറിക്ക് തൊട്ടടുത്തായാണ് പൊലിസുകാരുടെ വിശ്രമ മുറി. സ്‌ഫോടനം നടക്കുന്ന സമയത്ത് ഇവിടെ ആരും തന്നെ ഇല്ലാതിരുന്നതിനാല്‍ വന്‍ ദുരന്തം ഒഴിവായി. സ്റ്റേഷന് സമീപത്തെ അര്‍ഫാത്തില്‍ ഹസന്‍കുട്ടി, സുറാത്ത് ഹൗസില്‍ ജാഫര്‍, നാസ് ഹൗസില്‍ ഇഖ്ബാല്‍ എന്നിവരുടെ വീടുകളിലെ ജനല്‍ ചില്ലുകളും തകര്‍ന്നിട്ടുണ്ട്. വീട്ടുപകരണങ്ങള്‍ക്കും നാശം സംഭവിച്ചു. അതേസമയം പൊലിസ് സ്റ്റേഷന്‍ വളപ്പില്‍ തന്നെ നടന്ന സ്‌ഫോടനം നാട്ടുകാരെ പരിഭ്രാന്തിയിലാക്കിയിരിക്കുകയാണ്. ബോംബ് സ്‌ക്വാഡ്, ഡോഗ് സ്‌ക്വാഡ്, ഫയര്‍ഫോഴ്‌സ് അടക്കമുള്ള സംഘം സ്ഥലത്തെത്തി പരിശോധന നടത്തി. പൈപ്പ് ബോംബിന്റേത് എന്ന തരത്തിലുള്ള അവശിഷ്ടങ്ങള്‍ പരിശോധനയില്‍ കണ്ടെത്തിയിട്ടുണ്ട്. വടകര ഡിവൈ.എസ്.പി കെ. ചന്ദ്രന്‍ അടക്കമുള്ള ഉന്നത ഉദ്യോഗസ്ഥര്‍ ചോമ്പാല സ്റ്റേഷനിലെത്തി. സംഭവത്തില്‍ ചോമ്പാല പൊലിസും സ്‌പെഷല്‍ ബ്രാഞ്ചും അന്വേഷണം ആരംഭിച്ചിട്ടുണ്ട്.