ആലപ്പുഴ: നാടക സമിതിയുടെ അഭിനയ പരിശീലന ക്യാംപില്‍ കടന്നുകയറി അക്രമണം നടത്തിയ കേസില്‍ ഒരാളെ പൊലിസ് അറസ്റ്റ് ചെയ്തു. മുതുകുളം തെക്ക് സ്വദേശി സുമേഷി(31)നെയാണ് കനകക്കുന്ന് പൊലിസ് അറസ്റ്റ് ചെയ്തത്. ഇന്നലെ കനകക്കുന്ന് ജെട്ടിക്ക് സമീപത്ത് നിന്ന് എസ്.ഐ ജി. സുരേഷ്‌കുമാറിന്റെ നേതൃത്വത്തിലുള്ള പൊലിസാണ് പ്രതിയെ കസ്റ്റഡിയില്‍ എടുത്തത്. മൂന്നാം പ്രതിയാണ് സുമേഷ്. ഇയാളാണ് മുഖ്യപ്രതികളെ രക്ഷപ്പെടാന്‍ സഹായിച്ചത്.
ചൊവ്വാഴ്ച രാത്രിയാണ് കൊല്ലം കേന്ദ്രമായി പ്രവര്‍ത്തിച്ചുവരുന്ന നാടക സമിതിയുടെ പരിശീലന ക്യാംപില്‍ കടന്നുകയറി അക്രമം നടത്തിയത്. മുതുകുളം തെക്ക് 305-ാം നമ്പര്‍ എസ്.എന്‍.ഡി.പി ശാഖാ ഓഡിറ്റോറിയത്തിലാണ് അഭിനയ പരിശീലനം നടന്നു വന്നത്. നടന്‍ അറ്റിങ്ങല്‍ സ്വദേശി ധനഞ്ജയന്(57) അക്രമത്തിനിടെ പരുക്കേറ്റിരുന്നു. കത്തികൊണ്ടുളള അക്രമത്തില്‍ മുഖത്തിന് വെട്ടേറ്റ ഇയാള്‍ വണ്ടാനം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. മൈക്ക് സെറ്റും മറ്റ് ഉപകരണങ്ങളും അക്രമികള്‍ നശിപ്പിച്ചു.