ചെറുവത്തൂര്‍:  റോഡ് സുരക്ഷാനിയമങ്ങള്‍ കാറ്റില്‍ പറത്തി സ്‌കൂള്‍ വാഹനങ്ങള്‍ കുതിച്ചു പായുമ്പോള്‍ അതിനു തടയിടാന്‍ വിദ്യാഭ്യാസ വകുപ്പും. മോട്ടോര്‍ വാഹനവകുപ്പിന്റെ 17 നിര്‍ദേശങ്ങള്‍ കര്‍ശനമായി പാലിക്കണമെന്ന് സ്‌കൂള്‍ അധികൃതര്‍ക്ക് പൊതുവിദ്യാഭ്യാസ വകുപ്പ് നിര്‍ദേശം നല്‍കി. സ്വന്തമായി വാഹനങ്ങളില്ലാത്ത വിദ്യാലയങ്ങള്‍ താല്‍ക്കാലിക സംവിധാനം എന്ന നിലയില്‍ സ്വകാര്യ വാഹനങ്ങളില്‍ കുട്ടികളെ വിദ്യാലയങ്ങളില്‍ എത്തിക്കുന്നുണ്ട്.  ഇത്തരം വാഹനങ്ങള്‍ നിര്‍ബന്ധമായും 'ഓണ്‍ സ്‌കൂള്‍ ഡ്യൂട്ടി' എന്ന് മുന്‍വശത്തും, പിറകു വശത്തും രേഖപ്പെടുത്തണം. വെള്ളപ്രതലത്തില്‍ നീലനിറത്തിലുള്ള അക്ഷരങ്ങളിലായിരിക്കണം ഇത് രേഖപ്പെടുത്തേണ്ടത്.

നേരത്തെ തന്നെ ഇക്കാര്യത്തില്‍ നിര്‍ദേശം നല്‍കിയിരുന്നുവെങ്കിലും ഭൂരിപക്ഷം വാഹനമുടമകളും ഇങ്ങനെ രേഖപ്പെടുത്തിയിട്ടില്ല. മുഴുവന്‍ സ്‌കൂള്‍ വാഹനങ്ങളിലും ഫസ്റ്റ്എയ്ഡ് ബോക്‌സ്, ഫയര്‍ എക്സ്റ്റിഗ്യുഷര്‍ എന്നിവ നിര്‍ബന്ധമായും സൂക്ഷിക്കണം. കുട്ടികളുടെ ബാഗുകള്‍ സൂക്ഷിക്കാന്‍ പ്രത്യേകം സൗകര്യം ഒരുക്കണമെന്ന് നിര്‍ദേശമുണ്ടെങ്കിലും അതും പലരും പാലിക്കാറില്ല. എന്നാല്‍ ഈ നിര്‍ദേശം കൃത്യമായി പാലിക്കണമെന്നും അറിയിച്ചിട്ടുണ്ട്. ചുരുങ്ങിയത് 10വര്‍ഷം ഡ്രൈവിങ് പരിചയമുള്ളവരെ മാത്രമേ സ്‌കൂള്‍ വാഹനങ്ങളുടെ ഡ്രൈവര്‍മാരായി നിയമിക്കാവൂ.

മോട്ടോര്‍വാഹന നിയമങ്ങള്‍ ലംഘിച്ചതിന്റെ പേരില്‍ ഒരു വര്‍ഷത്തില്‍ രണ്ടുതവണ ശിക്ഷ ലഭിച്ച ഡ്രൈവര്‍മാരെ തുടരാന്‍ അനുവദിക്കരുത്. സ്‌കൂള്‍ വാഹനങ്ങളില്‍ യാത്രചെയ്യുന്ന കുട്ടികളുടെ പേര്, രക്ഷിതാവിന്റെ പേരും വിലാസവും, ബന്ധപ്പെടാന്‍ കഴിയുന്ന ഫോണ്‍നമ്പര്‍ എന്നിവ നിര്‍ബന്ധമായും വാഹനങ്ങളില്‍ സൂക്ഷിക്കണം. സുരക്ഷയുടെ ഭാഗമായി വാഹനങ്ങളില്‍ രക്ഷിതാക്കളുടെയോ, അധ്യാപകരുടെയോ സാന്നിധ്യം ഉറപ്പാക്കണം. വാഹന ഡ്രൈവര്‍മാരുടെ കുട്ടികളോടുള്ള പെരുമാറ്റം മനസിലാക്കുന്നതിനായി സ്‌കൂള്‍ അധികൃതരോ, പി.ടി.എ ഭാരവാഹികളോ പരിശോധന നടത്തികയും വേണമെന്നും സര്‍ക്കുലറില്‍ പറയുന്നു. സ്‌കൂള്‍ വാഹനങ്ങളുടെ വേഗത നിശ്ചിതപരിധിയില്‍ കൂടാതിരിക്കാന്‍ സ്പീഡ് ഗവേണര്‍ നിര്‍ബന്ധമായും സ്ഥാപിക്കണം തുടങ്ങിയവയാണ് പ്രധാന നിര്‍ദേശങ്ങള്‍.

സ്‌കൂള്‍ വാഹനങ്ങള്‍ സുരക്ഷാ നിര്‍ദേശങ്ങള്‍ പാലിക്കാതെ സര്‍വിസ് നടത്തുന്നത് തടയുന്നതിനായി  ബാലവകാശ കമ്മിഷന്റെ  നിര്‍ദേശ പ്രകാരം ട്രാന്‍സ്‌പോര്‍ട്ട് കമ്മിഷണര്‍ തയാറാക്കിയ നിര്‍ദേശങ്ങളാണ് പൊതുവിദ്യാഭ്യാസ ഡയറക്ടര്‍ വിദ്യാലയങ്ങളിലേക്ക് നല്‍കിയിരിക്കുന്നത്.