ബാലുശ്ശേരി: നന്മണ്ട-13ല്‍ മദ്യപസംഘം എക്‌സൈസ് ഉദ്യോഗസ്ഥരെ ആക്രമിച്ച് പരുക്കേല്‍പ്പിച്ചു. പരുക്കേറ്റ സി.കെ ബാബുരാജന്‍, സുനില്‍ എന്നിവരെ താമരശേരി താലൂക്ക് ആശുപത്രിയില്‍ പ്രവേശിപ്പിച്ചു.
കഴിഞ്ഞദിവസം നന്മണ്ട വില്ലേജ് ഓഫിസിന് പിന്‍വശത്തെ പറമ്പിലാണ് എക്‌സൈസ് സംഘത്തെ മദ്യപസംഘം തടഞ്ഞുവച്ച് മര്‍ദിച്ചത്. ഡ്യൂട്ടിയിലുള്ള എക്‌സൈസ് ഉദ്യാഗസ്ഥരെ മര്‍ദിച്ചതിനും കൃത്യനിര്‍വഹണത്തില്‍ തടസമുണ്ടാക്കിയതിനും സലീഷ്, ഹരിദാസന്‍, വിജേഷ്, പ്രഭാകരന്‍, പ്രദീപന്‍ എന്നിവര്‍ക്കു പുറമെ കണ്ടാലറിയാവുന്ന രണ്ടുപേര്‍ക്കുമെതിരേയാണ് കേസെടുത്തത്.
വില്ലേജ് ഓഫിസ് പരിസരം, ടൗണിലെ നിര്‍മാണത്തിലിരിക്കുന്ന കടകള്‍, മൂലേംമാവ്, പോസ്റ്റ് ഓഫിസ് റോഡ് എന്നിവിടങ്ങളിലാണ് മദ്യപാനവും വില്‍പ്പനയും തകൃതിയായി നടക്കുന്നത്. വൈകിട്ട് അഞ്ചു കഴിഞ്ഞാല്‍ വില്ലേജ് ഓഫിസ് പരിസരത്തേക്ക് പ്രവേശിച്ചവര്‍ക്കുനേരെ അസഭ്യവും അക്രമവുമാണ് നടക്കുന്നതെന്ന് നാട്ടുകാര്‍ നല്‍കിയ പരാതിയില്‍ പറയുന്നു.
മദ്യപസംഘത്തിന്റെ അക്രമങ്ങള്‍ ജനങ്ങളുടെ സൈ്വരജീവിതം നഷ്ടപ്പെടുത്തുന്നതായി വ്യാപകമായ പരാതി ഉയര്‍ന്ന സാഹചര്യത്തിലാണ് എക്‌സൈസ് സംഘം രംഗത്തെത്തിയത്.
നിരപരാധികള്‍ പോലും അക്രമിക്കപ്പെടുന്നതായും പരാതിയുണ്ട്. സുഹൃത്തിന്റെ വീട്ടില്‍ പുസ്തകം വാങ്ങാനെത്തിയ താമരശേരി സ്വദേശിയായ വിദ്യാര്‍ഥിയെ കരുണാറാം സ്‌കൂളിനടുത്ത് എടച്ചേരിത്താഴത്ത് മദ്യപിച്ചുകൊണ്ടിരിക്കുന്ന ഒരു സംഘമാളുകള്‍ തടഞ്ഞുവച്ച് കുപ്പിച്ചില്ലുപയോഗിച്ച് മുറിവേല്‍പ്പിച്ചതായും പരാതിയുണ്ട്. പൊലിസെത്തിയാണ് വിദ്യാര്‍ഥിയെ മോചിപ്പിച്ചത്.
നേരത്തെ ചില യുവജന സംഘടനകള്‍ മദ്യപസംഘങ്ങള്‍ക്കെതിരേ ശക്തമായി രംഗത്തെത്തിയിരുന്നു. ഇതില്‍ അയവു വന്നതോടെയാണ് അടുത്തിടെ വീണ്ടും അക്രമം പുനരാരംഭിച്ചത്. ഒളിവിലായ പ്രതികള്‍ക്കു വേണ്ടി പൊലിസ് അന്വേഷണം ഊര്‍ജിതമാക്കിയിട്ടുണ്ട്.