ശാസ്താംകോട്ട(കൊല്ലം):പി.ഡി.പി. ചെയര്‍മാന്‍ അബ്ദുള്‍ നാസര്‍ മഅ്ദനി ഇന്ന് കേരളത്തിലെത്തും. മകന്റെ വിവാഹത്തില്‍ പങ്കെടുക്കാനും മാതാപിതാക്കളെ കാണാനും സുപ്രിം കോടതിയില്‍ നിന്ന് അനുമതി ലഭിച്ചതിനെ തുടര്‍ന്നാണ് മഅ്ദനിയുടെ കേരള യാത്രക്ക് വഴിയൊരുങ്ങിയത്. ഇന്ന് ഉച്ചക്ക് 2.10ന് എയര്‍ ഏഷ്യ വിമാനത്തില്‍ ബംഗളൂരുവില്‍ നിന്ന് യാത്ര തിരിക്കുന്ന മഅ്ദനി മൂന്നോടെ നെടുമ്പാശ്ശേരിയിലെത്തും. 

ഭാര്യ സുഫിയാ മഅ്ദനി, ഇളയ മകന്‍ സെലാഹുദ്ദീന്‍ അയ്യൂബി, മൂന്ന് സഹായികള്‍, നാലു സുരക്ഷാ ഉദ്യോഗസ്ഥര്‍ തുടങ്ങിയവരാണ് മഅ്ദനിയെ അനുഗമിക്കുന്നത്. നാലിന് റോഡു മാര്‍ഗം അന്‍വാര്‍ശ്ശേരിയിലേക്ക് തിരിക്കും. തൊട്ടടുത്ത് സഹോദരനോടൊപ്പം താമസിക്കുന്ന മാതാപിതാക്കളെ കണ്ടതിനു ശേഷം അന്‍വാര്‍ശ്ശേരി യംത്തീംഖാനയിലെത്തും. എട്ടിന് വൈകിട്ട് ട്രെയിന്‍ മാര്‍ഗം തലശ്ശേരിക്ക് മടങ്ങി തലശ്ശേരി മുനിസിപ്പല്‍ ഹാളില്‍ ഒന്‍പതിന് നടക്കുന്ന മകന്‍ ഹാഫീസ് ഉമര്‍ മുക്താറിന്റെ വിവാഹത്തില്‍ പങ്കെടുക്കും.
മഅ്ദനിക്ക് ഇന്നുമുതല്‍ പത്തൊന്‍പതുവരെ ജന്മനാട്ടില്‍ തങ്ങാനാണ് സുപ്രിംകോടതിയുടെ അനുമതി.
കേരളത്തില്‍ തങ്ങാന്‍ ഓഗസ്റ്റ് ഒന്ന് മുതല്‍ പതിനാല് വരെയാണ് സുപ്രിം കോടതി ആദ്യം അനുമതി നല്‍കിയിരുന്നത്.
എന്നാല്‍ കര്‍ണാടക സര്‍ക്കാര്‍ സുരക്ഷ ചെലവുകള്‍ക്കായി വന്‍ തുക ആവശ്യപ്പെട്ടതോടെയായിരുന്നു യാത്ര മുടങ്ങിയത്.
വീണ്ടും മഅ്ദനി സുപ്രിം കോടതിയെ സമീപിച്ചതോടെയാണ് സുരക്ഷാ ചെലവുകള്‍ക്കുള്ള തുക കുറയ്ക്കുകയും തങ്ങാനുള്ള തിയതി ആറ് മുതല്‍ 19 വരെയായി ഉത്തരവിടുകയും ചെയ്തത്. ജന്മനാട്ടില്‍ മാതാപിതാക്കളെ കാണാന്‍ കോടതി മഅ്ദനിക്ക് അനുവാദം നല്‍കുന്നത് നാലാം തവണയാണ്.