പയ്യന്നൂര്‍: കൊക്കാനിശേരി മഠത്തുംപടി സുബ്രഹ്മണ്യസ്വാമി ക്ഷേത്രത്തില്‍ കവര്‍ച്ച. ക്ഷേത്രത്തിന്റെ വടക്കുഭാഗത്തെ വാതിലിന്റെ പൂട്ടുതകര്‍ത്ത് അകത്തുകടന്ന മോഷ്ടാവ് ശ്രീകോവിലിനു മുന്‍വശത്തെ ഭണ്ഡാരം മോഷ്ടിച്ചു. ഇന്നലെ പുലര്‍ച്ചെ അഞ്ചോടെ പൂജാരി ക്ഷേത്രത്തിലെത്തിയപ്പോഴാണ് മോഷണം അറിയുന്നത്. മോഷ്ടിച്ച ഭണ്ഡാരം തകര്‍ത്ത നിലയില്‍ ക്ഷേത്രപറമ്പില്‍ ഉപേക്ഷിച്ച നിലയില്‍ കണ്ടെത്തി.
സ്റ്റോര്‍ റൂമിന്റെ പൂട്ടും തകര്‍ത്തിട്ടുണ്ട്. ക്ഷേത്രം ഭാരവാഹികള്‍ വിവരമറിയിച്ചതിനെ തുടര്‍ന്ന് എസ്.ഐ എം. നിജീഷിന്റെ നേതൃത്വത്തില്‍ പൊലിസും വിരലടയാള വിദഗ്ധരും സ്ഥലത്തെത്തി പരിശോധന നടത്തി.
ക്ഷേത്രത്തില്‍ പ്രതിഷ്ഠാദിന ഉത്സവം നടക്കാനിരിക്കയാണ് മോഷണം. ക്ഷേത്ര കമ്മിറ്റി ഇന്നു ഭണ്ഡാരം തുറന്ന് പണം എണ്ണി തിട്ടപ്പെടുത്താനിരിക്കെയാണ് കവര്‍ച്ച. രണ്ടുവര്‍ഷം മുന്‍പും ഈ ക്ഷേത്രത്തിലെ ഭണ്ഡാരങ്ങള്‍ കവര്‍ന്നിരുന്നു.