തിരുവനന്തപുരം: സംസ്ഥാനത്ത് രാഷ്ട്രീയ സംഘട്ടനങ്ങളില്‍ പരുക്കേറ്റ ബി.ജെ.പി പ്രവര്‍ത്തകരെയും കൊല്ലപ്പെട്ട പ്രവര്‍ത്തകരുടെ കുടംബാംഗങ്ങളെയും കാണാന്‍ കേന്ദ്ര മന്ത്രി അരുണ്‍ ജെയ്റ്റ്‌ലി ഇന്നു തലസ്ഥാനത്തെത്തും.

രാവിലെ 11.15ന് പ്രത്യേക വിമാനത്തില്‍ എത്തുന്ന ജയ്റ്റ്‌ലി ആദ്യം കഴിഞ്ഞ ദിവസം കൊല്ലപ്പെട്ട ആര്‍.എസ്.എസ് പ്രവര്‍ത്തകന്‍ രാജേഷിന്റെ വസതി സന്ദര്‍ശിക്കും. പിന്നീട ശ്രീകാര്യത്തു നടക്കുന്ന അനുസ്മരണ ചടങ്ങില്‍ പങ്കെടുക്കും.

തുടര്‍ന്ന് അക്രമത്തില്‍ പരുക്കേറ്റ ആര്‍.എസ്.എസ് നേതാവ് ജയപ്രകാശിന്റെ വസതി സന്ദര്‍ശിക്കും. ഉച്ചയ്ക്ക് ആറ്റുകാല്‍ അംബിക ഓഡിറ്റോറിയത്തില്‍ അക്രമങ്ങളില്‍ പരുക്കേറ്റ പാര്‍ട്ടി പ്രവര്‍ത്തകരുടെ കുടുംബാംഗങ്ങളുമായി കൂടിക്കാഴ്ച നടത്തും. പിന്നീട് മാധ്യമങ്ങളെ കാണും.

അതേസമയം, ആര്‍.എസ്.എസ്, ബി.ജെ.പി രാഷ്ട്രീയ അജണ്ടയുടെ ഭാഗമായി എത്തുന്ന ജെയ്റ്റ്‌ലിയോട് വേദനകള്‍ പങ്കിടാന്‍ സി.പി.എമ്മിന്റെ തലസ്ഥാന ജില്ലയിലെ 21 രക്തസാക്ഷി കുടുംബാംഗങ്ങളും എത്തുമെന്ന് പാര്‍ട്ടി നേതാക്കള്‍ അറിയിച്ചു. രാവിലെ 10ന് രാജ്ഭവന് മുന്നില്‍ അവര്‍ സത്യഗ്രഹമിരിക്കും.

സി.പി.എം ആക്രമണത്തിന്റെ ഭാഗമായാണ് രാജേഷ് കൊല്ലപ്പെട്ടതെന്ന് വരുത്തുന്നതിനൊപ്പം കേരളം രാഷ്ട്രീയ സംഘര്‍ഷങ്ങളുടെ നാടാണെന്ന് വരുത്താനുള്ള സംഘപരിവാര്‍ ഗൂഢാലോചനയും കേന്ദ്ര മന്ത്രിയുടെ സന്ദര്‍ശനത്തിനു പിന്നിലുണ്ടെന്ന് നേതാക്കള്‍ ആരോപിച്ചു. തലസ്ഥാനത്ത് സമീപ ദിവസങ്ങളില്‍ നടന്ന ആര്‍.എസ്.എസ് കലാപത്തിന്റെ യഥാര്‍ഥ്യം വിശദീകരിച്ച് സി.പി.എം ജില്ലാ സെക്രട്ടറി ആനാവൂര്‍ നാഗപ്പന്‍ ജെയ്റ്റിലിക്ക് തുറന്ന കത്ത് എഴുതിയിട്ടുമുണ്ട്.