പയ്യന്നൂര്‍: പൊലിസിന് ജനകീയമുഖം നല്‍കാന്‍ സ്റ്റേഷന്‍ മോടികൂട്ടി പയ്യന്നൂര്‍ പൊലിസ് സ്റ്റേഷന്‍. ഇതിനോടനുബന്ധിച്ച് പൂന്തോട്ടവും വായനാ കോര്‍ണറുമാണ് ഇവിടെയൊരുക്കുന്നത്. ഇനി കുട്ടികള്‍ക്കുള്ള പാര്‍ക്ക് കൂടി ഒരുക്കാനുള്ള ശ്രമത്തിലാണ് പയ്യന്നൂര്‍ പൊലിസ്. ജനകീയ മുഖം വാക്കില്‍ മാത്രമല്ല, കെട്ടിലും മട്ടിലും അടിമുടി മാറിക്കൊണ്ടിരിക്കുകയാണു പയ്യന്നൂരിലെ പൊലിസ്. ഇതിന്റെ ഭാഗമായി മോടി കൂട്ടലിന്റെ തിരക്കിലാണ് പൊലിസ് സ്റ്റേഷനും. വിവിധ ആവശ്യങ്ങള്‍ക്കായി സ്‌റ്റേഷനില്‍ എത്തുന്നവര്‍ക്കു മനസിനു കുളിരേകുന്ന കാഴ്ചകളാണ് പയ്യന്നൂര്‍ പൊലിസ് ഒരുക്കുന്നത്. സ്റ്റേഷനു മുന്നില്‍ പുല്‍ത്തകിടി ഒരുക്കുന്ന പ്രവൃത്തി പൂര്‍ത്തിയായി. ഇതിനിടയില്‍ പൂച്ചെടികളും നട്ടുപിടിപ്പിച്ചിട്ടുണ്ട്. കാക്കിക്കുള്ളിലെ കലാകാരന്മാരും കഠിനാധ്വാനികളും തന്നെയാണ് ഈ മോടിപിടിപ്പിക്കലിനു പിന്നില്‍. കൂടാതെ സ്റ്റേഷനിലെത്തുന്നവര്‍ക്ക് ഇരിപ്പിടവും വായനാപ്പുരയൊരുക്കുക കൂടി ചെയ്തിട്ടുണ്ട്. ജനമൈത്രി പൊലിസ് സംവിധാനം ഏറ്റവും നല്ല രീതിയില്‍ നടന്നുവരുന്ന സ്റ്റേഷന്‍ കൂടിയാണു പയ്യന്നൂര്‍.
സി.ഐ കെ. വിനോദ് കുമാര്‍, പ്രിന്‍സിപ്പല്‍ എസ്.ഐ കെ.പി ഷൈന്‍ എന്നിവരും പൂര്‍ണ പിന്തുണയുമായി എത്തിയപ്പോള്‍ പൊലിസുകാര്‍ക്കും ആവേശം ഇരട്ടിയായി. നവീകരണ പ്രവൃത്തിക്കു സംഘടനകളും നാട്ടുകാരും പൊലിസിന് സഹായവുമായി എത്തി. ഇനി പയ്യന്നൂര്‍ സ്റ്റേഷനിലെത്തി കേസും വഴക്കും ഒക്കെ തീര്‍ത്ത് പുറത്തിറങ്ങിയാല്‍ ഒരല്‍പം റിലാക്‌സ് ചെയ്ത് മടങ്ങാവുന്ന അന്തരീക്ഷമാവുകയാണ് സ്റ്റേഷന്‍ പരിസരം.