കാഞ്ഞങ്ങാട്: മംഗളൂരു-തിരുവനന്തപുരം എക്‌സ്പ്രസിനടിയില്‍ കോണ്‍ക്രീറ്റ് കഷ്ണം കുടുങ്ങിയത് പരിഭ്രാന്തി പരത്തി. ഇന്നലെ വൈകിട്ട് 3.40നാണ് സംഭവം. ട്രെയിന്‍ കാഞ്ഞങ്ങാട് റെയില്‍വേ സ്റ്റേഷനില്‍നിന്ന് വിട്ടയുടന്‍ പ്ലാറ്റ് ഫോമിലേക്ക് കയറാനായി പാളത്തിനടുത്ത്‌വച്ചിരുന്ന കോണ്‍ക്രീറ്റ് കഷ്ണം പതിനാറാം ബോഗിക്കടിയില്‍ കുടുങ്ങുകയായിരുന്നു. ഇതോടെ ട്രെയിനിന്റെ അടി ഭാഗത്തുനിന്ന് കോണ്‍ക്രീറ്റ് പൊടിഞ്ഞ് പുകപോലെ ഉയര്‍ന്നുപൊങ്ങി. ഇത് യാത്രക്കാരില്‍ പരിഭ്രാന്തി പരത്തി. ബോഗികളില്‍ ഉലച്ചില്‍കൂടി അനുഭവപ്പെട്ടതോടെ ഗാര്‍ഡ് ട്രെയിന്‍ നിര്‍ത്താന്‍ നിര്‍ദേശം നല്‍കി. തുടര്‍ന്ന് കോണ്‍ക്രീറ്റ് കഷ്ണങ്ങള്‍ മാറ്റി ഇരുപത് മിനുട്ടിന് ശേഷമാണ്് ട്രെയിന്‍ യാത്ര തുടര്‍ന്നത്. ട്രെയിന്‍ വേഗത്തിലത്താത്തിനാല്‍ അപകടം വഴിമാറുകയായിരുന്നു. ട്രെയിന്‍ പോയശേഷം ട്രാക്കിനടുത്തുള്ള വലിയ കല്ലുകളെല്ലാം ജീവനക്കാര്‍ എടുത്തുമാറ്റി. അതേസമയം, കാഞ്ഞങ്ങാട് റെയില്‍വേ സ്റ്റേഷനില്‍ ട്രെയിന്‍ പാളം തെറ്റിയെന്ന അഭ്യൂഹം പരന്നതും ജനങ്ങളില്‍ പരിഭ്രാന്തി പരത്തി. പൊടി ഉയരുന്നത് കണ്ട് ട്രെയിന്‍ യാത്രക്കാരില്‍ പലരും അലമുറയിട്ട് കരഞ്ഞതും പരിഭ്രാന്തി വര്‍ധിപ്പിച്ചു.