ദമാം: ശമ്പളമോ ആനുകൂല്യങ്ങളോ ഇല്ലാതെ ആറുമാസത്തോളം കഷ്ടപ്പെട്ട ഇന്ത്യൻ വീട്ടുജോലിക്കാരിയ്ക്ക് മലയാളി സാമൂഹ്യ പ്രവർത്തകരുടെ ഇടപെടലിൽ മോചനം. ഉത്തർപ്രദേശ് ലക്‌നൗ സ്വദേശിനിയായ സുൽത്താന ബീഗമാണ് ദമാമിലെ നവയുഗം ജീവകാരുണ്യപ്രവർത്തകരുടെ സഹായത്തോടെ നിയമ നടപടികൾ പൂർത്തിയാക്കി നാട്ടിലേയ്ക്ക് മടങ്ങിയത്. ഒന്നര വർഷം മുമ്പ് സഊദി തലസ്ഥാന നഗരിയായ റിയാദിൽ സ്വദേശിയുടെ വീട്ടിൽ വീട്ടു ജോലിക്കാരിയായ എത്തിയ സുൽത്താന പിന്നീട് കിഴക്കൻ സഊദി നഗരിയായ ദമാമിലെത്തിപ്പെടുകയായിരുന്നു.
       റിയാദിൽ സഊദി പൗരന്റെ വീട്ടിൽ ഏജൻസി വഴി എത്തിയ യുവതി ഒരു വർഷത്തോളം ജോലി ചെയ്തുവെങ്കിലും ആവശ്യത്തിന് ശമ്പളമോ മതിയായ വിശ്രമമോ ലഭിച്ചിരുന്നിരുന്നില്ല. ഇതിനിടെ മാനസിക സമ്മർദ്ദം അവരുടെ ആരോഗ്യത്തെയും ബാധിച്ചിരുന്നു. തുടർന്ന് ഏജൻസി അവരെ ദമാമിലെ മറ്റൊരു വീട്ടിൽ ജോലിയ്ക്കായി അയക്കുകയായിരുന്നു. അവിടെ സ്ഥിതി ആദ്യത്തേതിലും മോശമായിരുന്നു. ആറുമാസത്തോളം ശമ്പളം കിട്ടാതായപ്പോൾ ഗത്യന്തരമില്ലാതെ വീട്ടിൽ നിന്നും ഒളിച്ചോടി അടുത്തുള്ള പോലീസ് സ്റ്റേഷനിൽ അഭയം തേടിയതിനെ തുടർന്ന് പോലീസുകാർ യുവതിയെ ദമാം വനിതാ അഭയ കേന്ദ്രത്തിൽ എത്തിക്കുകയായിരുന്നു.
        ഇവിടെ വെച്ചാണ് നവയുഗം ജീവകാരുണ്യ പ്രവർത്തകർ സുൽത്താനക്ക് ആശ്വാസമായി രംഗത്തെത്തിയത്. യുവതി നൽകിയ വിവരങ്ങൾ വെച്ച് അവരുടെ സ്‌പോൺസറെ ബന്ധപ്പെടാൻ ശ്രമിച്ചെങ്കിലും യഥാർത്ഥ സ്‌പോൺസറെ കണ്ടെത്താനായില്ല. ഇതിനിടെ, അനാരോഗ്യം മൂലം വലഞ്ഞിരുന്ന സുൽത്താനയെ നവയുഗം പ്രവർത്തക മഞ്ജു മണിക്കുട്ടൻ ജാമ്യത്തിൽ ഇറക്കി സ്വന്തം വീട്ടിലെത്തിച്ച് ഒരു മാസത്തോളം ഇവിടെ കഴിഞ്ഞു. ഇതിനിടെ ഇന്ത്യൻ എംബസ്സിയിൽ നിന്നും സുൽത്താനയ്ക്ക് ഔട്ട്പാസ്സ് സംഘടിപ്പിക്കുകയും വനിതാ അഭയകേന്ദ്രം അധികാരികളുടെ സഹായത്തോടെ ഫൈനൽ എക്‌സിറ്റ് അടിച്ചു വാങ്ങുകയുംചെയ്‌തു. ദമാമിലെ ഒരു പ്രവാസി സൗജന്യമായി നൽകിയ വിമാന ടിക്കറ്റിലാണ് സഹായിച്ചവർക്ക് നന്ദി പറഞ്ഞു യുവതി നാട്ടിലേക്ക് മടങ്ങിയത്.