കൊച്ചി: സ്വതന്ത്ര മാധ്യമപ്രവര്‍ത്തനത്തിനു കൂച്ചുവിലങ്ങിടാനുള്ള ശ്രമമാണ് സര്‍ക്കാര്‍ നടത്തുന്നതെന്നു പ്രതിപക്ഷ നേതാവ് രമേശ് ചെന്നിത്തല. ഇതിന്റെ ഉദാഹരണമാണ് മാധ്യമ നിയന്ത്രണം സംബന്ധിച്ച സര്‍ക്കാര്‍ ഉത്തരവ്. അത് 'മാധ്യമ മാരണ ഉത്തരവ്'ആണെന്നും ഇത്തരം കാര്യങ്ങളല്ല, സ്വതന്ത്ര മാധ്യമപ്രവര്‍ത്തനത്തിനു സാഹചര്യം സൃഷ്ടിക്കുകയാണ് സര്‍ക്കാര്‍ ചെയ്യേണ്ടതെന്നും ചെന്നിത്തല പറഞ്ഞു. സീനിയര്‍ ജേര്‍ണലിസ്റ്റ്‌സ് ഫോറത്തിന്റെ ഏഴാമത് വാര്‍ഷിക യോഗം ഉദ്ഘാടനം ചെയ്യുകയായിരുന്നു അദ്ദേഹം. മാധ്യമപ്രവര്‍ത്തകരുടെ പെന്‍ഷന്‍ 15,000 രൂപ ആക്കി വര്‍ധിപ്പിക്കണമെന്ന ആവശ്യം അടുത്ത നിയമസഭാ സമ്മേളനത്തില്‍ അവതരിപ്പിക്കും. മുതിര്‍ന്ന മാധ്യമപ്രവര്‍ത്തകരുടെ മറ്റൊരു ആവശ്യമായ ആരോഗ്യ ഇന്‍ഷുറന്‍സ് പദ്ധതി സംസ്ഥാനത്ത് വ്യാപകമാക്കണം.
മുതിര്‍ന്ന മാധ്യമപ്രവര്‍ത്തകര്‍ നേരിടുന്ന ആരോഗ്യ പ്രശ്‌നങ്ങള്‍ക്ക് ഏക പോംവഴി ആരോഗ്യ ഇന്‍ഷുറന്‍സ് പദ്ധതി മാത്രമാണെന്നും അതിനാല്‍ പദ്ധതി നടപ്പാക്കാന്‍ സര്‍ക്കാര്‍ നടപടി സ്വീകരിക്കണമെന്നും ചെന്നിത്തല ആവശ്യപ്പെട്ടു. നെടുവട്ടം സത്യശീലന്‍ അധ്യക്ഷനായി.