വളാഞ്ചേരി: സംതൃപ്ത ന്യൂനപക്ഷമുള്ളിടത്തേ സമാധാനമുണ്ടാകൂവെന്നു പാണക്കാട് സയ്യിദ് സാദിഖലി ശിഹാബ് തങ്ങള്‍. വളാഞ്ചേരി മര്‍കസ് 30ാം വാര്‍ഷിക മെഗാ സമ്മേളനത്തിന്റെ ഭാഗമായി സംഘടിപ്പിച്ച ന്യൂനപക്ഷ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
സയ്യിദ് ആബിദ് ഹുസൈന്‍ തങ്ങള്‍ എം.എല്‍.എ അധ്യക്ഷനായി. ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ മുഖ്യാതിഥിയായി. എം.പി അബ്ദുസ്സമദ് സമദാനി മുഖ്യപ്രഭാഷണം നടത്തി. ന്യൂനപക്ഷ ഭാഷയും സംസ്‌കാരവും ഇന്ത്യന്‍ സംസ്‌കൃതിയുടെ പാരമ്പര്യത്തിന്റെ ഭാഗമാണെന്നും അതിന്റെ നാശം ഇന്ത്യന്‍ പൈതൃകത്തിന്റെ നാശമാണെന്നും അസമാധാനമാണ് അരാജകത്വത്തെ പ്രതിരോധിക്കാനുള്ള മികച്ച ആയുധമെന്നും അദ്ദേഹം പറഞ്ഞു. അബ്ദുര്‍റഹ്മാന്‍ രണ്ടത്താണി, ഹൈദരലി വാഫി ഇരിങ്ങാട്ടിരി, ആതവനാട് മുഹമ്മദ് കുട്ടി, ഇബ്‌റാഹിം ഹാജി തിരൂര്‍, കാടാമ്പുഴ മൂസ ഹാജി സംസാരിച്ചു. എം.കെ കൊടശ്ശേരിയുടെ തെരഞ്ഞെടുത്ത ലേഖനങ്ങള്‍ എന്ന പുസ്തകം പ്രകാശനം ചെയ്തു. വഖ്ഫ് ബോഡ് ചെയര്‍മാന്‍ പാണക്കാട് സയ്യിദ് റഷീദലി ശിഹാബ് തങ്ങള്‍ നജീബ് കാന്തപുരത്തിനു നല്‍കിയാണ് പ്രകാശനം നിര്‍വഹിച്ചത്.