ലണ്ടന്‍: ഇംഗ്ലീഷ് പ്രീമിയര്‍ ലീഗിന് മുന്നോടിയായുള്ള കമ്മ്യൂണിറ്റി ഷീല്‍ഡ് പോരാട്ടത്തില്‍ ആഴ്‌സണലിന് കിരീടം. ഇംഗ്ലീഷ് പ്രീമിയര്‍ ലീഗ് ചാംപ്യന്‍മാരായ ചെല്‍സിയെ പെനാല്‍റ്റി ഷൂട്ടൗട്ടില്‍ 4-1ന് കീഴടക്കിയാണ് ഗണ്ണേഴ്‌സ് കിരീടം നേടിയത്. നിശ്ചിത സമയത്ത് ഇരു ടീമുകളും ഓരോ ഗോള്‍ വീതം നേടി സമനില പാലിച്ചതിനെ തുടര്‍ന്ന് പെനാല്‍റ്റിയിലാണ് വിജയികളെ നിര്‍ണയിച്ചത്.
നിശ്ചിത സമയത്ത് വിക്ടര്‍ മോസസിലൂടെ ചെല്‍സി മുന്നിലെത്തി. പിന്നീട് പുതിയ താരം സയിദ് കോല്‍സിനാക്ക് ആഴ്‌സണലിന് സമനില സമ്മാനിച്ചു. പെനാല്‍റ്റി ഷൂട്ടൗട്ടില്‍ ചെല്‍സി ഗോള്‍ കീപ്പര്‍ കുര്‍ട്ടോയിസും റയല്‍ മാഡ്രിഡില്‍ നിന്ന് ഇത്തവണ ചെല്‍സി നിരയിലെത്തിയ ആല്‍വരോ മൊറാറ്റയും കിക്കുകള്‍ പുറത്തേക്കടിച്ചു കളഞ്ഞു. നാല് വര്‍ഷത്തിനിടെ ആഴ്‌സണല്‍ നേടുന്ന മൂന്നാം കമ്മ്യൂണിറ്റി ഷീല്‍ഡ് കിരീടമാണ് ഇത്തവണത്തേത്.