ന്യൂഡല്‍ഹി: ഏകീകൃത ചരക്ക് സേവന നികുതി(ജി.എസ്.ടി)യില്‍ നിത്യോപയോഗ സാധനങ്ങളില്‍ ചിലതിന് വിലകുറഞ്ഞപ്പോള്‍ മറ്റു ചിലത് ഉപഭോക്താക്കള്‍ക്കുണ്ടാക്കിയത് കനത്ത ഭാരമാണ്. ജി.എസ്.ടി കൗണ്‍സില്‍ യോഗത്തില്‍ ഇഡ്ഡലി, ദോശ മാവ്, പാചക വാതക ലൈറ്റര്‍ തുടങ്ങിയവയുടെ വില കുറയ്ക്കാന്‍ തീരുമാനിച്ചു.
അതേസമയം സ്‌പോര്‍ട്‌സ് യൂട്ടിലിറ്റി വെഹിക്കിള്‍ (എസ്.യു.വി), ആഡംബര കാറുകള്‍ എന്നിവയുടെ വില 15 ശതമാനം മുതല്‍ 25 ശതമാനം വരെ വില ഉയരുമെന്നാണ് ജി.എസ്.ടി കൗണ്‍സില്‍ വ്യക്തമാക്കുന്നത്. ഇവയുടെ സെസ് വര്‍ധിപ്പിച്ച സാഹചര്യത്തിലാണ് വിലക്കയറ്റത്തിന് ഇടയാക്കുന്നത്.
ആഡംബര വാഹനങ്ങള്‍ക്ക് സെസ് വര്‍ധിപ്പിക്കാന്‍ ജി.എസ്.ടി നിയമത്തില്‍ ഭേദഗതി വരുത്തുന്നതിന് ജി.എസ്.ടി കൗണ്‍സില്‍ അംഗീകാരം നല്‍കിയിട്ടുണ്ട്.
ജി.എസ്.ടി വന്നതോടെ കാറുകളുടെ വിലയില്‍ 28 ശതമാനത്തിന്റെ വര്‍ധനയുണ്ടായിട്ടുണ്ട്. ഇതിനൊപ്പം സെസും ഏര്‍പ്പെടുത്തുന്നതോടെ ഇപ്പോള്‍ തന്നെ 40 ശതമാനത്തോളം നികുതി വന്നിട്ടുണ്ട്.
നാല് മീറ്റര്‍ നീളവും 1200 സി.സി എന്‍ജിന്‍ കപ്പാസിറ്റിയുമുള്ള പെട്രോള്‍ കാറുകള്‍ക്ക് ഒരു ശതമാനമാണ് സെസ്. ഈ രീതിയിലുള്ള ഡീസല്‍ കാറുകള്‍ക്ക് 3 ശതമാനമാണ് സെസ്. എന്നാല്‍ കാര്‍ നിര്‍മാതാക്കളില്‍ നിന്ന് ഉയര്‍ന്ന സെസ് വാങ്ങിക്കാന്‍ തീരുമാനിച്ചതോടെ ചെറുകാറുകളുടെ വില്‍പന വിലയിലും വര്‍ധനവുണ്ടായിട്ടുണ്ട്.
അതേസമയം ഇപ്പോഴത്തെ നിയമവ്യവസ്ഥയില്‍ പലസാധനങ്ങള്‍ക്കും വില വര്‍ധിച്ചത് അടുത്തമാസം ഒന്‍പതിന് ഹൈദരാബാദില്‍ നടക്കുന്ന ജി.എസ്.ടി കൗണ്‍സില്‍ യോഗത്തില്‍ ചര്‍ച്ച ചെയ്യുമെന്ന് ധനകാര്യമന്ത്രി അരുണ്‍ ജെയ്റ്റ്‌ലി അറിയിച്ചു.
പ്രത്യേക ബ്രാന്‍ഡുകളിലല്ലാതെ ഇറങ്ങുന്ന ഭക്ഷ്യവസ്തുക്കളൊഴികെയുള്ളവക്ക് 5 ശതമാനം നികുതിയാണ് ഏര്‍പ്പെടുത്തിയിട്ടുള്ളത്. എന്നാല്‍ ഇവക്ക് ഏര്‍പ്പെടുത്തിയ അധികബാധ്യത ഇല്ലാതാക്കാന്‍ നിര്‍മാതാക്കള്‍ അവരുടെ ബ്രാന്‍ഡ് ഒഴിവാക്കുന്ന പ്രവണത വര്‍ധിച്ചിട്ടുണ്ട്. ഇതിനിടയില്‍ ജി.എസ്.ടി കൗണ്‍സില്‍ 24 സാധനങ്ങളുടെ നികുതി നിലവാര ഘടനയില്‍ മാറ്റം വരുത്താനും തീരുമാനിച്ചിട്ടുണ്ട്.