പിറവം: യുവാക്കള്‍ വയോധികനെ തലക്കടിച്ചു കൊലപ്പെടുത്തി. എടക്കാട്ടുവയല്‍ പാര്‍പ്പാംകൊട് കണ്ടംകരിക്കല്‍ (ചെറുകുന്നേല്‍) നാരായണന്‍ കുട്ടി (70) ആണ് മരിച്ചത്. പിറവം മാര്‍ക്കറ്റ് കെട്ടിടത്തിനുസമീപമാണ് സംഭവം. സംഭവവുമായി ബന്ധപ്പെട്ട് പിറവം പൊഴിമല കോളനിയില്‍ പൊഴിമല വീട്ടില്‍ കൊച്ചു ചൈന എന്നുവിളിക്കുന്ന അജീഷ്, ചെറുവേലികുടി വീട്ടില്‍ സിദു എന്നുവിളിക്കുന്ന ജിതേഷ് എന്നിവരെ പൊലിസ് അറസ്റ്റ് ചെയ്തു. മദ്യത്തിനും മയക്കുമരുന്നിനും അടിമകളായ പ്രതികള്‍ തിങ്കളാഴ്ച രാത്രി സിനിമ തിയറ്ററില്‍ കയറി ബഹളമുണ്ടാക്കിയതായി പറയുന്നു. ഇവിടെ നിന്ന് ഇറക്കിവിട്ട ഇവര്‍ പിറവം മാര്‍ക്കറ്റിന് മുന്നിലൂടെ ഉച്ചത്തില്‍ പാട്ടുപാടിപ്പോകവെ പരിസരത്ത് കിടന്നുറങ്ങുകയായിരുന്ന നാരായണന്‍ കുട്ടിയുമായി വാക്കേറ്റം ഉണ്ടായതായും പറയുന്നു. തുടര്‍ന്ന് ഇരുവരും ചേര്‍ന്ന് സിമന്റ് കട്ടകൊണ്ട് നാരായണന്‍ കുട്ടിയുടെ തലക്കടിക്കുകയായിരുന്നു. നാരായണന്‍ കുട്ടി ചോര വാര്‍ന്ന് മരിക്കുകയായിരുന്നു. സംഭവത്തിനുശേഷം പ്രതികള്‍ ത്രീറോഡ് കവലയില്‍ മൈത്രീ മാര്‍ക്കറ്റിന് സമീപം ജോസ് എന്നയാളെ കുത്തിപ്പരുക്കേല്‍പ്പിക്കുകയും ചെയ്തു. ജോസ് ഇപ്പോള്‍ കോട്ടയം മെഡിക്കല്‍ കോളജില്‍ ചികിത്സയിലാണ്. മരിച്ച നാരായണന്‍ കുട്ടി സ്ഥിരമായി വീട്ടില്‍ പോകുന്ന പതിവില്ലാത്ത ആളാണ്. ഭാര്യ: പരേതയായ അമ്മിണി. മക്കള്‍: ഷിജി, പരേതനായ ഷാജി. മരുമക്കള്‍: ശ്രീജിത്, ഉഷ. മൃതദേഹം പോസ്റ്റുമോര്‍ട്ടത്തിന് ശേഷം ഇന്ന് എടക്കാട്ടുവയല്‍ പൊതു ശ്മശാനത്തില്‍ സംസ്‌കരിക്കും.