തിരുവനന്തപുരം: ചികിത്സ കിട്ടാതെ തമിഴ്‌നാട് സ്വദേശി മരിച്ച സംഭവം അത്യന്തം വേദനാജനകമാണെന്ന് മുഖ്യമന്ത്രി പിണറായി വിജയന്‍. സംഭവത്തില്‍ പ്രാഥമിക അന്വേഷണത്തിന് നിര്‍ദേശിച്ചതായി മുഖ്യമന്ത്രി പറഞ്ഞു.

ചികിത്സ നല്‍കാതെ രോഗിയെ തിരിച്ചയയ്ക്കുന്നത് നിയമവിരുദ്ധമാണെന്നും ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ ആവശ്യമായി ക്രമീകരണങ്ങള്‍ നടത്തുമെന്നും അദ്ദേഹം പറഞ്ഞു.

ഞായറാഴ്ച രാത്രിയാണ് തമിഴ്‌നാട് സ്വദേശിയുടെ വാഹനം അപകടത്തില്‍പ്പെട്ട് കൊല്ലത്തെ സ്വകാര്യ ആശുപത്രിയില്‍ ചികിത്സയ്‌ക്കെത്തിയത്. എന്നാല്‍, രോഗിയുടെ കൂടെ നില്‍ക്കാന്‍ ആളില്ലെന്ന കാരണം പറഞ്ഞാണ് ചികിത്സ നിഷേധിച്ചത്. രോഗിക്ക് വെന്റിലേറ്റര്‍ സൗകര്യം നല്‍കാന്‍ ആവശ്യപ്പെട്ടപ്പോഴും ആശുപത്രി അധികൃതര്‍ നിഷേധിക്കുകയായിരുന്നു. തുടര്‍ന്ന് തിരുവനന്തപുരം മെഡിക്കല്‍ കോളജിലേക്കുള്ള യാത്രമധ്യേ രോഗി മരണപ്പെടുകയായിരുന്നു. തമിഴ്‌നാട് തിരുനെല്‍വേലി സ്വദേശി മുരുകനാണ് മരണപ്പെട്ടത്.

സംഭവത്തില്‍ ചികിത്സ നിഷേധിച്ച കൊല്ലം മെഡിസിറ്റിക്കെതിരേ കൊട്ടിയം പൊലിസ് കേസെടുത്തിരുന്നു.