കുന്ദമംഗലം: ദേശീയപാതയില്‍ ഏറ്റവും തിരക്കേറിയ ഭാഗങ്ങളില്‍ വരച്ചിരുന്ന സീബ്രാലൈനുകള്‍ മാഞ്ഞത് നൂറുക്കണക്കിന് വിദ്യാര്‍ഥികള്‍ അടക്കമുള്ള കാല്‍നടയാത്രക്കാര്‍ക്ക് ഭീഷണിയാകുന്നു. പഴയ ബസ് സ്റ്റാന്‍ഡ് പരിസരം, പെരിങ്ങൊളം റോഡ് ജങ്ഷന്‍ മുതല്‍ കാരന്തൂര്‍ ടൗണ്‍ വരെ എന്നിവിടങ്ങളിലെ സീബ്രാലൈനുകളാണ് മാഞ്ഞുപോയിരിക്കുന്നത്. ഇതു കാല്‍നട യാത്രക്കാരെയും ഡ്രൈവര്‍മാരെയും ഒരു പോലെ ആശങ്കയിലാക്കുന്നുണ്ട്.
ഇരു ബസ് സ്റ്റാന്‍ഡുകള്‍ക്കു സമീപവും ഹൈസ്‌കൂള്‍ മെയിന്‍ ഗേറ്റിന് മുന്‍പിലും അപകടസാധ്യത വര്‍ധിച്ചിരിക്കുകയാണ്. കുന്ദമംഗലം എച്ച്.എസ്.എസ്, എ.യു.പി, എ.എല്‍.പി, മര്‍കസ് ബോയ്‌സ്, ഗേള്‍സ് സ്‌കൂളുകളിലെ നൂറുക്കണക്കിന് വിദ്യാര്‍ഥികളാണ് ഏറെ ബുദ്ധിമുട്ടുന്നത്. പ്രസ്തുത സ്‌കൂളുകളിലെത്തുന്ന വദ്യാര്‍ഥികളെല്ലാം ബസുകളില്‍ വന്ന് പുതിയ സ്റ്റാന്‍ഡിലും പഴയ സ്റ്റാന്‍ഡിലും ഇറങ്ങി സീബ്രാലൈനിലൂടെ കടക്കണം. ഇരു സ്റ്റാന്‍ഡിലും ബസ് കയറാനെത്തുന്ന യാത്രക്കാരും ഈ സീബ്രാലൈനിനെയാണ് ആശ്രയിക്കുന്നത്. വന്‍ദുരന്തം വന്ന് പെടും മുന്‍പ് അധികൃതര്‍ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.