മലപ്പുറം: എം പാനല്‍ ജീവനക്കാരെ കൂട്ടത്തോടെ പിരിച്ചുവിട്ടതിനെ തുടര്‍ന്നു ജില്ലയില്‍ ഇന്നലെയും കെ.എസ്.ആര്‍.ടി.സി സര്‍വിസുകള്‍ അവതാളത്തിലായി. കെ.എസ്.ആര്‍.ടി.സിക്കു കൂടുതല്‍ വരുമാനം ലഭിക്കുന്ന കോഴിക്കോട്-പാലക്കാട്, കോഴിക്കോട്-വഴിക്കടവ് റൂട്ടുകളിലടക്കം സര്‍വിസുകള്‍ റദ്ദാക്കപ്പെട്ടു. സ്ഥിരം ജീവനക്കാരില്‍ അധിക ഡ്യൂട്ടിക്കു തയാറായവരെ ഉപയോഗിച്ചാണ് സര്‍വിസുകള്‍ നടത്തിയത്.
രാവിലെയുള്ള സര്‍വിസുകളാണ് റദ്ദാക്കിയവയില്‍ ഭൂരിഭാഗവും. വരും ദിവസങ്ങളിലും കൂടുതല്‍ സര്‍വിസുകള്‍ റദ്ദാക്കപ്പെടാനാണ് സാധ്യത. ഇതു സാധാരണ യാത്രക്കാര്‍ക്കു വന്‍ തിരിച്ചടിയാകും. മലപ്പുറം ഡിപ്പോയില്‍നിന്നുള്ള 15 സര്‍വിസുകളാണ് ഇന്നലെ ജീവനക്കാരില്ലാത്തതു മൂലം റദ്ദാക്കിയത്. വരുമാനക്കുറവുള്ള സര്‍വിസുകളാണ് ഇവയില്‍ കൂടുതലും. തിരൂരിലേക്കുള്ള 11 സര്‍വിസുകളില്‍ എട്ടെണ്ണം റദ്ദാക്കി. മലപ്പുറം ഡിപ്പോയില്‍നിന്ന് ആകെ 43 സര്‍വിസുകളാണുള്ളത്. 69 എം പാനല്‍ ജീവനക്കാരാണ് ഇവിടെയുണ്ടായിരുന്നത്. നിലമ്പൂര്‍ ഡിപ്പോയില്‍ വഴിക്കടവ്-കോഴിക്കോട് റൂട്ടില്‍ രാവിലെ മാത്രം അഞ്ചു സര്‍വിസുകള്‍ റദ്ദാക്കി. അധിക ഡ്യൂട്ടിക്കു ജീവനക്കാര്‍ തയാറാകാതെവന്നതോടെ 18 സര്‍വിസുകള്‍ റദ്ദാക്കേണ്ടിവന്നു. കോഴിക്കോട്-വഴിക്കടവ് റൂട്ടില്‍ 17 സര്‍വിസുകളാണുള്ളത്. ഡിപ്പോയുടെ പ്രധാന വരുമാനമാണ് ഈ റൂട്ട്. രണ്ട് ജെന്റം സര്‍വിസുകളടക്കം 44 സര്‍വിസുകളാണ് നിലമ്പൂരിലുള്ളത്. 53 താല്‍ക്കാലിക ജീവനക്കാരുണ്ടായിരുന്ന ഇവിടെ 40 സ്ഥിരം ജീവനക്കാര്‍ മാത്രമാണുള്ളത്.
പൊന്നാനിയില്‍നിന്നു രാവിലെ എറണാകുളത്തേക്കുള്ള രണ്ടു സര്‍വിസുകള്‍ റദ്ദാക്കി. 29 താല്‍ക്കാലിക ജീവനക്കാരും 69 സ്ഥിരം ജീവനക്കാരുമാണ് പൊന്നാനിയിലുണ്ടായിരുന്നത്. ജീവനക്കാര്‍ അധിക ഡ്യൂട്ടിയെടുത്തതോടെ വൈകിട്ട് മിക്ക സര്‍വിസുകളും നടത്താനായി.
ഇവിടെനിന്ന് 40 സര്‍വിസുകളാണുള്ളത്. തിരൂരിലേക്കാണ് കൂടുതലും. രണ്ടു കോയമ്പത്തൂര്‍, രണ്ട് എറണാകുളം, മഞ്ചേരി സര്‍വിസുകളാണ് മറ്റുള്ളവ.
പെരിന്തല്‍മണ്ണയില്‍നിന്നുള്ള നാലു സര്‍വിസുകള്‍ ഇന്നലെ റദ്ദാക്കി. 36 താല്‍ക്കാലിക ജീവനക്കാരായിരുന്നു ഇവിടെയുണ്ടായിരുന്നത്. അധിക ഡ്യൂട്ടിക്കു ജീവനക്കാര്‍ തയാറായത് ഇവിടെ പ്രതിസന്ധി കുറച്ചു. പിരിച്ചുവിട്ട നടപടിക്കെതിരേ എം പാനല്‍ ജീവനക്കാര്‍ മലപ്പുറം ഡിപ്പോയില്‍ പ്രതിഷേധം നടത്തി.