റിയാദ്: പ്രവാചക തിരുചര്യകള്‍ ജീവിതത്തിലുടനീളം പകര്‍ത്തി മാതൃകാ ജീവിതം നയിച്ച അത്തിപ്പറ്റ മൊയ്തീന്‍കുട്ടി മുസ്‌ല്യാരുടെ മരണം സമൂഹത്തിനു തീരാ നഷ്ടമാണെന്ന് സമസ്ത ഇസ്‌ലാമിക് സെന്റര്‍ സഊദി ദേശീയ കമ്മിറ്റി പ്രസ്താവിച്ചു. സമ്പത്ത് കൊണ്ടും മറ്റും ജീവിതത്തില്‍ ബൗദ്ധീക ഉന്നതിയിലേക്ക് എത്തിപ്പെടാന്‍ ഏറെ സാധ്യമായിരുന്നിട്ടും അതെല്ലാം തിരസ്‌കരിച്ചു ലളിത ജീവിതം നയിച്ചു മുസ്‌ലിം ആത്മീയ കൈരളിക്ക് നേതൃത്വം നല്‍കിയ മഹാന്റെ മരണം ആത്മീയരംഗത്തു നല്ലൊരു വിടവ് തന്നെയാണ് സൃഷ്ടിച്ചത്. അനേകായിരങ്ങള്‍ക്ക് ആന്തരികവെളിച്ചം പകരുന്ന ഖാദിരീശാദുലീ ആധ്യാത്മിക വഴികളുടെ ഗുരുനാഥന്‍, കമ്പോളതാല്‍പര്യങ്ങളോടും ഭൗതികാഭിനിവേശത്തോടും പുറംതിരിഞ്ഞു നില്‍ക്കുന്ന വ്യക്തിത്വം, വിനയവും ലാളിത്യവും വിളംബരം ചെയ്യുന്ന ശരീരവും ശരീരഭാഷയും, ഇരുപത്തിയേഴു വര്‍ഷം യു.എ.ഇ മതകാര്യവകുപ്പില്‍ സേവനം ചെയ്തിട്ടും ദിര്‍ഹമിന്റെയും ദീനാറിന്റെയും പളപളപ്പുയരാത്ത തനിനാടന്‍ ജീവിതം എന്നിവയെല്ലാം ഏറെ മാതൃകാ പരമായിരുന്നുവെന്നും ദേശീയ കമ്മിറ്റി പുറത്തിറക്കിയ അനുശോചന കുറിപ്പില്‍ പറഞ്ഞു.

മഹാന്റെ വിയോഗത്തില്‍ സഊദിയിലെ മുഴുവന്‍ പ്രവിശ്യ, സെന്‍ട്രല്‍, യൂണിറ്റ് തലങ്ങളിലും ഖത്മുല്‍ ഖുര്‍ആന്‍, തഹ്‌ലീല്‍, പ്രാര്‍ത്ഥനാ സദസ്സുകള്‍, അനുസ്മരണ സമ്മേളനങ്ങള്‍ എന്നിവ നടത്താനും ദേശീയ കമ്മിറ്റി ഭാരവാഹികളായ പ്രസിഡന്റ് സയ്യിദ് ഉബൈദുല്ല തങ്ങള്‍, ജനറല്‍ സെക്രട്ടറി അലവിക്കുട്ടി ഒളവട്ടൂര്‍, ചെയര്‍മാന്‍ അബൂബക്കര്‍ ഫൈസി ചെങ്ങമനാട്, ട്രഷറര്‍ കരീം ബാഖവി പൊന്മള, വര്‍ക്കിങ് സിക്രട്ടറി അറക്കല്‍ അബ്ദുറഹ്മാന്‍ മൗലവി എന്നിവര്‍ ആഹ്വാനം ചെയ്തു.