പാലക്കാട്: വിവാദത്തിലായ കൊലയാളി ഗെയിം' ബ്ലൂ വെയിന്‍' നിരോധിക്കണമെന്ന് കേന്ദ്രസര്‍ക്കാരിനോട് ആവശ്യപ്പെടുമെന്ന് മുഖ്യമന്ത്രി പിണറായി വിജയന്‍. നിയമസഭയില്‍ രാജു എബ്രഹാം എം.എല്‍.എയാണ് വിഷയം ഉന്നയിച്ചത്.

ഗെയിം ഉപയോഗിക്കുന്നവരെ പൊലിസ് നിരീക്ഷിക്കുന്നുണ്ട്. അപകടകാരിയായ ഗെയിമിനെതിരെ പൊലിസ് മുന്നറിയിപ്പ് നല്‍കിക്കഴിഞ്ഞിട്ടുണ്ടെന്നും മുഖ്യമന്ത്രി പറഞ്ഞു. ഇത്തരം വിഷയങ്ങള്‍ കൈകാര്യം ചെയ്യുന്നത് ഐ.ടി മിഷന്റെ കീഴില്‍ വരുന്ന കംപ്യൂട്ടര്‍ എമര്‍ജന്‍സി റെഡ്‌പോണ്‍സ് ടീം ആണെന്നും മുഖ്യമന്ത്രി സഭയെ അറിയിച്ചു.

ബ്ലൂവെയില്‍ ചലഞ്ച് ഉള്‍പ്പെടെ അപകടകാരികളായ ഗെയിമുകള്‍ക്കു കുട്ടികളും കൗമാരക്കാരും അടിമകളാവാതെ ശ്രദ്ധിക്കണമെന്ന് കേരള പൊലിസ് ഹൈടെക് സെല്‍ കഴിഞ്ഞ ദിവസം മുന്നറിയിപ്പ്് നല്‍കിയിരുന്നു.

ബ്ലൂ വെയില്‍ ഗെയിം ഉപയോഗിക്കുന്നത് ശ്രദ്ധയില്‍പെട്ടാല്‍ പൊലിസ് ഹൈടെക് സെല്ലിനെ അറിയിക്കണമെന്നും ആവശ്യമെങ്കില്‍ കൗണ്‍സലിങ് അടക്കമുള്ള സഹായങ്ങള്‍ ലഭ്യമാക്കുമെന്നും സംസ്ഥാന പൊലിസ് മേധാവി ലോക്‌നാഥ് ബെഹ്‌റ അറിയിച്ചിരുന്നു.

ഇന്റര്‍നെറ്റ് അധിഷ്ഠിത ഗെയിമായ ബ്ലൂ വെയില്‍ വളരെ അപകടകാരിയായ ഗെയിമാണ്. 50 ഘട്ടങ്ങളിലൂടെയാണ് ഈ ഗെയിം കടന്നുപോകുന്നത്. കളിക്കാര്‍ ഓരോഘട്ടത്തിലും ഗെയിം അഡ്മിനിസ്‌ട്രേറ്ററുടെ നിയന്ത്രണത്തിലായിരിക്കും. അഡ്മിനിസ്‌ട്രേറ്റര്‍ നല്‍കുന്ന നിര്‍ദേശപ്രകാരം കളിക്കാര്‍ ഓരോ കാര്യങ്ങള്‍ ചെയ്യാന്‍ നിര്‍ബന്ധിതരാകുന്നു.

പുലര്‍ച്ചെ ഉണരുക, ഒറ്റയ്ക്കിരുന്ന് ഭയപ്പെടുത്തുന്ന സിനിമകള്‍ കാണുക, ക്രെയിനിന്‍ കയറുക, കൈകളില്‍ മുറിവുണ്ടണ്ടാക്കുക, കാലില്‍ സൂചി കുത്തിക്കയറ്റുക എന്നിങ്ങനെ തുടങ്ങി അമ്പതാമത്തെ ഘട്ടത്തില്‍ കളിക്കാരെ ആത്മഹത്യക്കു പ്രേരിപ്പിക്കുകയും ചെയ്യുന്നു. ലോകത്തിന്റെ വിവിധ ഭാഗങ്ങളിലായി നിരവധി കൗമാരക്കാരാണ് ഈ ഗെയിമിന്റെ പ്രേരണയാല്‍ ആത്മഹത്യ ചെയ്തത്. 14നും 18നും ഇടയിലുള്ള കുട്ടികളാണ് ഇത്തരത്തില്‍ അപകടത്തില്‍പെട്ടത്. ചില മാധ്യമങ്ങളില്‍ വന്ന വിവരപ്രകാരം നിരവധി ആളുകള്‍ ഇന്ത്യയില്‍ ഈ ഗെയിമിന് അടിമകളായതായാണ് കണക്കാക്കുന്നത്. കുട്ടികള്‍ ഇന്റര്‍നെറ്റ് ഉപയോഗിക്കുമ്പോഴും കംപ്യൂട്ടര്‍ ഗെയിം കളിക്കുമ്പോഴും മാതാപിതാക്കള്‍ കൂടുതല്‍ ശ്രദ്ധിക്കണമെന്നും ബെഹ്‌റ വ്യക്തമാക്കിയിരുന്നു.