വടകര: ഏറ്റവും കൂടുതല്‍ പ്ലാസ്റ്റിക് പൊടിച്ച് റോഡ് പ്രവൃത്തിക്ക് ഉപയോഗിച്ച പഞ്ചായത്തിനുള്ള അവാര്‍ഡ് അഴിയൂര്‍ ഗ്രാമപഞ്ചായത്തിന് ലഭിച്ചു. ക്ലീന്‍ കേരള കമ്പനിയാണ് ആദരവ് നല്‍കിയത്. കിലയില്‍ നടന്ന പരിപാടിയില്‍ പഞ്ചായത്ത് പ്രസിഡന്റ് ഇ.ടി അയ്യൂബും സെക്രട്ടറി ടി. ഷാഹുല്‍ ഹമീദും കില ഡയരക്ടര്‍ ഡോ. ജോയ് ഇളമണ്ണില്‍നിന്നും അവാര്‍ഡ് ഏറ്റുവാങ്ങി.
കൊച്ചി കോര്‍പറേഷന്‍ 75 ടണ്‍ പൊടിച്ച് നല്‍കി ഒന്നാം സ്ഥാനവും, തിരുവനന്തപുരം കോര്‍പറേഷന്‍ 62 ടണ്‍ പ്ലാസ്റ്റിക്ക് പൊടിച്ച് രണ്ടാം സ്ഥാനവും നേടിയപ്പോള്‍ കേരളത്തിലെ ഗ്രാമപഞ്ചായത്തുകളില്‍ 24,000 കിലോ പ്ലാസ്റ്റിക് പൊടിച്ചാണ് അഴിയൂര്‍ ഒന്നാംസ്ഥാനം നേടിയത്. റോഡ് പ്രവൃത്തിക്ക് ടാര്‍ ഉപയോഗിക്കാം എന്ന സാങ്കേതിക വിദ്യ വികസിപ്പിച്ച് പത്മശ്രീ അവാര്‍ഡ് നേടിയ ശാസ്ത്രജ്ഞന്‍ ഡോ. ആര്‍. വാസുദേവന്‍, ക്ലീന്‍ കേരള കമ്പനി എം.ഡി പി. കേശവന്‍ നായര്‍ എന്നിവര്‍ ചടങ്ങില്‍ പങ്കെടുത്തു.