തിരുവനന്തപുരം: എന്‍.എസ്.എസിനും ജനറല്‍ സെക്രട്ടറി ജി. സുകുമാരന്‍ നായര്‍ക്കുമെതിരെ കടുത്ത വിമര്‍ശനവുമായി വീണ്ടും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. സുകുമാരന്‍ നായരുടേത് ആര്‍.എസ്.എസ്- ബി.ജെ.പി സമരങ്ങള്‍ക്ക് തീപകരാനുള്ള നടപടിയാണെന്നാണ് കോടിയേരിയുടെ വിമര്‍ശനം. 'സമദൂരം പക്ഷം ചേരലോ' എന്ന തലക്കെട്ടില്‍ ദേശാഭിമാനിയിലെ ലേഖനത്തിലൂടെയാണ് കോടിയേരിയുടെ വിമര്‍ശനം.

എന്‍.എസ്.എസ് വീണ്ടുവിചാരത്തിനു തയാറാകണം. അയ്യപ്പജ്യോതിയില്‍ പങ്കെടുക്കാനുള്ള ആഹ്വാനം എന്‍എസ്എസ് പാരമ്പര്യത്തിനു നിരക്കുന്നതല്ലെന്നും കോടിയേരി പറഞ്ഞു. വനിതാമതിലില്‍ തെളിയുന്നത് മന്നത്തിന്റേയും ചട്ടമ്പിസ്വാമിയുടേയും ആശയമാണ്. ആര്‍എസ്എസിന് കൂട്ടുനില്‍ക്കുന്ന നടപടി ചരിത്രപരമായ തലകുത്തിവീഴ്ചയായിരിക്കുമെന്നും കോടിയേരി പറഞ്ഞു.

എന്‍.എസ്.എസിനെ ആര്‍.എസ്.എസ് തൊഴുത്തില്‍ക്കൊണ്ട് കെട്ടാനുള്ള നീക്കമാണ് നടക്കുന്നത്. ഇതിനെതിരെ എന്‍.എസ്.എസില്‍ നിന്നുതന്നെ എതിര്‍പ്പ് ഉയരണം. എന്‍.എസ്.എസിന്റെ നടപടി ആത്മഹത്യാപരമെന്നും കഴിഞ്ഞ ദിവസം കോടിയേരി പറഞ്ഞിരുന്നു.

കേരള നവോത്ഥാനത്തില്‍ പങ്കുവഹിച്ച ചരിത്ര പുരുഷന്മാരില്‍ പ്രധാനിയായ മന്നത്ത് പത്മനാഭന്റെ നവോത്ഥാന പാതയില്‍നിന്നുള്ള വ്യതിചലനമാണ് എന്‍എസ്എസ് നേതാവില്‍ ഇന്നുകാണുന്നത്. മന്നത്തിന്റെ പൊതുജീവിതത്തില്‍ ഒരു ഘട്ടത്തില്‍ കമ്യൂണിസ്റ്റ് വിരുദ്ധ വിമോചനസമരത്തിന്റെ നേതൃപദവി വഹിച്ചിരുന്നൂവെന്നത് വിസ്മരിക്കുന്നില്ല. പക്ഷേ, അപ്രകാരമൊന്ന് ഒരു ചെറിയ കാലയളവില്‍ സംഭവിച്ചതൊഴിച്ചാല്‍ അദ്ദേഹത്തിന്റെ ജീവിതം പൊതുവില്‍ നവോത്ഥാന വീക്ഷണത്തേയും ദുരാചാരങ്ങള്‍ അവസാനിപ്പിക്കാനുള്ള പോരാട്ടങ്ങളേയും ശക്തിപ്പെടുത്തുന്നതായിരുന്നു. അത് മറന്നുകൊണ്ടാണ് അയിത്തത്തിനും അനാചാരങ്ങള്‍ക്കുമെതിരെ സമരം നയിച്ച എന്‍എസ്എസിനെ ആര്‍എസ്എസിന്റെ തൊഴുത്തില്‍ കെട്ടാന്‍ നോക്കുന്നത്.

മറ്റാരുടെയും തൊഴുത്തില്‍ ഒതുങ്ങുന്ന പ്രസ്ഥാനമല്ല എന്‍.എസ്.എസ് എന്നും കോടിയേരി അത് ഓര്‍മിക്കണമെന്നും സുകുമാരന്‍ നായര്‍ കോടിയേരിക്ക് മറുപടി നല്‍കിയിരുന്നു. അതിന് ശ്രമിച്ചവരെല്ലാം നിരാശരായ ചരിത്രമാണുള്ളത്. എന്‍എസ്എസ് എന്നും വിശ്വാസികള്‍ക്ക് ഒപ്പമാണ്. നിരീശ്വരവാദത്തിന് എതിരുമാണെന്നും അദ്ദേഹം പറഞ്ഞിരുന്നു. ഇതിന് പിന്നാലെയാണ് കോടിയേരി വീണ്ടും എന്‍എസ്എസിനെതിരെ രംഗത്തെത്തിയത്.

വനിതാമതിലിനെ സംബന്ധിച്ച് തെറ്റിദ്ധാരണാജനകമായ ഒരു പ്രസ്താവന കേരള കാത്തലിക് ബിഷപ് കോണ്‍ഫറന്‍സി (കെസിബിസി)ല്‍നിന്നുണ്ടായി. മതപരമായ ചേരിതിരിവ് സൃഷ്ടിക്കുമെന്ന ആശങ്കയാണ് അവര്‍ പ്രകടിപ്പിച്ചത്. മതപരമായ ഒരു വിവേചനവുമില്ലാത്ത, ഒരു മതവിഭാഗത്തേയും അകറ്റിനിര്‍ത്താത്ത ഒരു വന്‍മതിലാണ് ഉയരാന്‍ പോകുന്നത്. അതുകൊണ്ടുതന്നെ യഥാര്‍ഥ വസ്തുത മനസ്സിലാക്കാത്തതുകൊണ്ടുള്ള വിമര്‍ശനമാണ് ഇവരുടേതെന്നും കോടിയേരി പറഞ്ഞു.