ന്യൂഡല്‍ഹി: സിക്കിം അതിര്‍ത്തിയില്‍ ഇന്ത്യാ-ചൈന സൈന്യങ്ങള്‍ വിട്ടുവീഴ്ചക്കില്ലാത്ത രീതിയില്‍ നിലയുറപ്പിച്ചതോടെ മേഖലയില്‍ പ്രതിസന്ധി രൂക്ഷമായി. ഇന്ത്യ-ഭൂട്ടാന്‍-ചൈന രാജ്യങ്ങളുടെ സംഗമ സ്ഥാനമായ ദോക്്‌ലാമിനെ ചൊല്ലിയുള്ള അവകാശവാദമാണ് യഥാര്‍ഥത്തില്‍ അതിര്‍ത്തിയില്‍ പ്രതിസന്ധി രൂക്ഷമാക്കിയത്. 

ഏത് നിമിഷവും സൈനിക നടപടിയുണ്ടായേക്കുമെന്ന ആശങ്കയില്‍ ഇന്ത്യന്‍ അതിര്‍ത്തിയിലെ നതാങ് ഗ്രാമത്തില്‍ നിന്ന് ഒഴിഞ്ഞുപോകാന്‍ ജനങ്ങളോട് സൈന്യം ആവശ്യപ്പെട്ടിട്ടുണ്ട്.
ഈ ഗ്രാമത്തില്‍ 100ഓളം പേര്‍ താമസിക്കുന്നുണ്ട്. ഇവരോട് എത്രയും പെട്ടെന്ന് വീടുവിട്ട് പോകാന്‍ സൈന്യം ഉത്തരവിട്ടിട്ടുണ്ടെന്ന് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു. ഇന്ത്യ-ചൈന സൈനികര്‍ നിലയുറപ്പിച്ച ഭാഗത്തു നിന്ന് 35 കി.മീറ്റര്‍ മാത്രം അകലെയാണ് നതാങ് ഗ്രാമം.
അതിര്‍ത്തിയിലെ സുക്‌ന മേഖലയിലേക്ക് കൂടുതല്‍ സൈന്യത്തെ നിയോഗിച്ചിട്ടുണ്ട്. എന്നാല്‍ മുന്‍കരുതല്‍ നടപടിയെന്ന നിലയിലാണ് ഇതെന്നും ഏതെങ്കിലും തരത്തിലുള്ള നടപടികളുണ്ടായാല്‍ ദുരന്തം ഒഴിവാക്കുന്നതിന്റെ ഭാഗമായാണ് ഗ്രാമവാസികളോട് ഒഴിഞ്ഞുപോകാന്‍ ആവശ്യപ്പെട്ടതെന്നുമാണ് സൈനിക വക്താവ് അറിയിച്ചത്.
എന്നാല്‍ ഗ്രാമവാസികളോട് ഒഴിഞ്ഞുപോകാന്‍ സൈന്യം അറിയിച്ചതായ വാര്‍ത്ത കേന്ദ്ര സര്‍ക്കാര്‍ നിഷേധിച്ചു. അതിനിടയില്‍ നൂറോളം വരുന്ന ജനങ്ങള്‍ താമസിക്കുന്ന ഗ്രാമമാണ് നതാങ് എന്നും ഇവിടെ സൈന്യത്തിന്റെ ശക്തമായ സാന്നിധ്യമുണ്ടെന്നും ഗ്രാമവാസികളെ ഉദ്ധരിച്ച് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു.
മേഖലയിലെ നീക്കങ്ങളെക്കുറിച്ച് നിലപാട് വ്യക്തമാക്കാന്‍ സൈന്യം തയാറായിട്ടില്ല. സെപ്റ്റംബറില്‍ നടക്കുന്ന വാര്‍ഷിക പരിശീലനത്തിനായാണ് ഇവിടെ കൂടുതല്‍ സൈനികരെ നിയോഗിച്ചതെന്നാണ് മുതിര്‍ന്ന സൈനിക ഉദ്യോഗസ്ഥന്‍ അറിയിച്ചത്.
യുദ്ധമില്ല, സമാധാനവുമില്ല എന്ന അവസ്ഥയാണ് മേഖലയിലെന്നും റിപ്പോര്‍ട്ട് ചെയ്യപ്പെടുന്നുണ്ട്.
അതേസമയം ഇന്ത്യക്കെതിരേ കൗണ്ട് ഡൗണ്‍ തുടങ്ങിയെന്ന് ചൈനയുടെ ഔദ്യോഗിക മാധ്യമം റിപ്പോര്‍ട്ട് ചെയ്തിരുന്നു. ഏഴ് ആഴ്ചയോളമായി മേഖലയില്‍ അസ്വസ്ഥത നിലനില്‍ക്കുകയാണ്.