കൗമാരക്കാരെ ഘട്ടംഘട്ടമായി മരണത്തിലേക്കടുപ്പിക്കുന്ന ബ്ലൂവെയില്‍ ഗെയിം ഇന്ന് കേരളത്തെ നടുക്കുകയാണ്. തിരുവനന്തപുരത്തും കണ്ണൂരും ബ്ലൂവെയില്‍ ലക്ഷണങ്ങളോടെയുള്ള രണ്ട് ആത്മഹത്യകള്‍ റിപ്പോര്‍ട്ട് ചെയ്തിരിക്കുന്നു. ഇതിനിടെയാണ് ബ്ലൂവെയില്‍ കാരണം 2006 ല്‍ മകനെ നഷ്ടപ്പെട്ട ഓര്‍മ്മകളുമായി എഴുത്തുകാരി എസ് സരോജം ഫെയ്‌സ്ബുക്കില്‍ പോസ്റ്റിട്ടിരിക്കുന്നത്.

അഞ്ചു തവണ പരാജയപ്പെട്ടിട്ടും ആറാം തവണയും ശ്രമിച്ച് ആത്മഹത്യ ചെയ്ത നൊമ്പരപ്പെടുത്തുന്ന ഓര്‍മ്മയാണ് മകനെപ്പറ്റി സരോജത്തിന് പറയാനുള്ളത്. ഇപ്പോള്‍ ബ്ലൂവെയില്‍ ആത്മഹത്യകള്‍ കാണിക്കുന്ന അതേരൂപത്തിലുള്ള ലക്ഷണങ്ങള്‍ അന്നുമുണ്ടായി. ഡെസ്‌ക്ടോപില്‍ നിറയെ, ആത്മഹത്യ ചെയ്ത സെലിബ്രിറ്റികളുടെ ചിത്രങ്ങളും ശരീരത്തില്‍ കുത്തിവരയ്ക്കലുമായിരുന്നു അതില്‍പ്രധാനം.

നിരവധി തവണ ഇതേക്കുറിച്ച് എഴുതണമെന്ന് വിചാരിച്ചിരുന്നുവെന്നും എന്നാല്‍ അറിയാത്തവര്‍ ഇതേപ്പറ്റി അറിയേണ്ടെന്നു കരുതി ഉപേക്ഷിച്ചതാണെന്നും സരോജം പറയുന്നു.

ഫെയ്‌സ്ബുക്ക് പോസ്റ്റിന്റെ പൂര്‍ണരൂപം

കൂട്ടുകാരേ Blue Whale പോലുള്ള Suicide Games ഒരു പുതിയ കാര്യമല്ല. 2006 ജൂലൈ 16- നുണ്ടായ സമാനമായൊരു സംഭവത്തില്‍ നീറിനീറിക്കഴിയുന്ന ഒരമ്മയാണ് ഞാന്‍ . അവന്‍റെ ആത്മഹത്യാശ്രമം വിജയിച്ചത് ആറാം തവണയായിരുന്നു . . ഓരോ ശ്രമവും പരാജയപ്പെടുമ്പോള്‍ പുതിയ മാര്‍ഗ്ഗങ്ങള്‍ പറഞ്ഞുകൊടുക്കുന്ന അഡ്മിന്‍! ഒരിക്കല്‍ രണ്ടാഴ്ചയോളം മെഡിക്കല്‍കോളേജിലെ തീവ്ര പരിചരണവിഭാഗത്തില്‍ കിടന്ന് രക്ഷപ്പെട്ട് വന്നതിനുശേഷം അവന്‍ തന്നെയാണ് ഗയിമിനെപ്പറ്റി എനിക്ക് പറഞ്ഞുതന്നത് . അവന്‍റെ കമ്പ്യൂട്ടര്‍ desktop നിറയെ ആത്മഹത്യ ചെയ്ത സെലിബ്രിറ്റികളുടെ ചിത്രങ്ങളും ഉണ്ടായിരുന്നു! ശരീരത്തില്‍ ചോരപൊടിയുന്ന കുത്തിവരയ്ക്കലുകളും. ഇനി അങ്ങനെ ചെയ്യില്ലെന്ന്‍ ഉറപ്പു തന്നതുമാണ് . എന്നിട്ടും admins-ന്‍റെ പ്രേരണ അതിജീവിക്കാന്‍ കഴിയാതെ ഒരു പാതിരാത്രിയില്‍ തെളിവെ ല്ലാം delete ചെയ്തിട്ട് അവന്‍ പോയി. തല വഴി കഴുത്തുവരെ മൂടിയ പ്ലാസ്റിക് കവര്‍ തെളിവായി പോലീസുകാരാരോ എടുത്തുകൊണ്ടുപോയി. ഇക്കാര്യങ്ങള്‍ പുറം ലോകത്തോട്‌ .വിളിച്ചുപറയണമെന്നു ഒരായിരംവട്ടം ഒരുങ്ങിയതാണ് .പക്ഷേ അറിയാത്ത കുട്ടികള്‍ അപകടകരമായ ഗെയിമിനെക്കുറിച്ച് അറിയാതിരിക്കട്ടെ എന്ന ചിന്ത എന്നെ പിന്തിരിപ്പിക്കുകയായിരുന്നു . ഇപ്പോള്‍ കേള്‍ക്കുന്ന വാര്‍ത്തകള്‍ എന്‍റെ സ്വസ്ഥത കെടുത്തുന്നു . ആകെ തളരുന്നു .