മക്ക: ഇന്ത്യന്‍ ഹജ്ജ് സൗഹൃദ സംഘം ഈമാസം 28ന് മക്കയിലെത്തുമെന്നു ഇന്ത്യന്‍ കോണ്‍സുല്‍ ജനറല്‍ നൂര്‍ റഹ്മാന്‍ ശൈഖ് അറിയിച്ചു. വിദേശകാര്യ സഹമന്ത്രി എം.ജെ അക്ബറിന്റെ നേതൃത്വത്തിലാണ് ഇന്ത്യന്‍ ഹജ്ജ് സൗഹൃദ സംഘം എത്തുക. വിവിധ സംസ്ഥാനങ്ങള്‍ വഴി 80,000 ലേറെ ഹാജിമാര്‍ ഇനിനകം പുണ്യഭൂമിയിലെത്തി. ഇത്തവണ 65,000 ഇന്ത്യന്‍ തീര്‍ഥാടകര്‍ക്കാണ് മശാഇര്‍ മെട്രോ ട്രെയിന്‍ സര്‍വിസ് ലഭ്യമാകുക.
ശേഷിക്കുന്നവര്‍ക്ക് മിന, അറഫാ, മുസ്ദലിഫ എന്നിവിടങ്ങളിലേക്ക് ബസ് സര്‍വിസുകള്‍ ലഭിക്കും.
മക്ക, മദീന സര്‍വിസിനും മക്കയില്‍ നിന്ന് ഹറമിലേക്കുള്ള സര്‍വിസിനും പുതിയ ബസുകളാണ് ഒരുക്കിയിരിക്കുന്നത്. ഇത്തരം കാര്യങ്ങളില്‍ സഊദി അധികൃതരുടെ ഭാഗത്തു നിന്നും വലിയ സഹകരണമാണ് ലഭിക്കുന്നത്. ഇന്ത്യന്‍ സന്നദ്ധ സേവക സംഘത്തിന്റെ പ്രവര്‍ത്തനവും ഇന്ത്യന്‍ ഹജ്ജ് മിഷന് വലിയ സഹായമാണ് നല്‍കുന്നതെന്നും അദ്ദേഹം പറഞ്ഞു.
1,70,025 ഹാജിമാരാണ് ഇന്ത്യയില്‍ നിന്ന് ഈ വര്‍ഷം ഹജ്ജിനെത്തുന്നത്. ഇതില്‍ 1,25,025 പേര്‍ ഇന്ത്യന്‍ ഹജ്ജ് കമ്മിറ്റി മുഖേനയും ബാക്കിയുള്ളവര്‍ സ്വകാര്യ സര്‍വീസുകള്‍ മുഖേനയുമാണ് എത്തുന്നത്. 13,000 പേര്‍ക്കാണ് ഗ്രീന്‍ കാറ്റഗറിയില്‍ ഹറമിനടുത്ത് താമസം ലഭ്യമാക്കിയത്.