അരീക്കോട്: കിളിക്കല്ലിങ്ങല്‍ വളവില്‍ അപകടം പതിവാകുന്നു. അരീക്കോട് - തിരൂര്‍ക്കാട് സംസ്ഥാന പാതയില്‍ സൗത്ത് പുത്തലം കിളിക്കല്ലിങ്ങല്‍ വളവിലാണ് അപകടം പതിവായിരിക്കുന്നത്. കഴിഞ്ഞ ഒരു ആഴ്ചക്കിടെ മാത്രമായി ഒന്‍പത് വാഹനങ്ങളാണിവിടെ അപകടത്തില്‍പ്പെട്ടത്.
കുത്തനെയുള്ള ഇറക്കവും കൊടുംവളവുമാണ് അപകടങ്ങള്‍ക്ക് കാരണം. കഴിഞ്ഞ ദിവസം അര്‍ധരാത്രി ഒന്നിന് മൂന്ന് ദിവസം ചരക്ക് ലോറിയും ബൈക്കും അപകടത്തില്‍പ്പെട്ടതിന് പുറമെ ഇന്നലെ പുലര്‍ച്ചെ നാലിനും ആറിനും ഇടക്കായി രണ്ട് കാറുകളും അപകടത്തില്‍പെട്ടിരുന്നു. ഇതില്‍ ഒന്ന് വൈദ്യുതി പോസ്റ്റിലിടിച്ച് തലനാരിഴയ്ക്കാണ് അപകടം ഒഴിവായത്. റോഡ് നിര്‍മാണത്തിലെ അശാസ്ത്രീയത ചൂണ്ടിക്കാട്ടി അരീക്കോട് പഞ്ചായത്തധികൃതര്‍ പൊതുമരാമത്ത് വകുപ്പിന് പരാതികള്‍ നല്‍കിയിട്ടുണ്ടെങ്കിലും ഫലമുണ്ടായില്ല. അപകടം പതിവായ ഇവിടെ വേണ്ട രീതിയില്‍ സൂചനാ ബോര്‍ഡ് സ്ഥാപിക്കാന്‍ പോലും അധികൃതര്‍ തയാറായിട്ടില്ല.
രാത്രി കാലങ്ങളിലാണ് ഏറെയും അപകടം ഉണ്ടാവുന്നത് എന്നതിനാല്‍ അപകടത്തില്‍ പരുക്കേല്‍ക്കുന്ന പലര്‍ക്കും ചികിത്സയും വൈകുകയാണ്. ഇതിന് പുറമെ പരിസര വാസികള്‍ ഏത് സമയവും അപകടം കാത്തുകഴിയേണ്ട അവസ്ഥയിലുമാണ്. റോഡിന്റെ വളവും കുത്തനെയുള്ള ഇറക്കവും ഒഴിവാക്കി റോഡ് നിര്‍മാണം നടത്തിയെങ്കില്‍ മാത്രമെ ഇവിടെ അപകടങ്ങള്‍ ഇല്ലാതാവുകയുള്ളു.