രാഹുല്‍ ഈശ്വര്‍ ഹാദിയയെ സന്ദര്‍ശിക്കുന്നതിന് പൊലിസ് ഇരട്ടത്താപ്പ് കാണിച്ചെങ്കിലും ഇതുവഴി ഹാദിയയുടെ പുതിയ കാര്യങ്ങള്‍ പുറംലോകത്തിന് കാണിച്ചു തന്നതിന് രാഹുലിനോട് നന്ദി പറയണം. കാരണം, ഹാദിയയുടെ പിതാവ് ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തില്‍ പറഞ്ഞിരുന്നത്, തന്റെ മകള്‍ ഇസ്‌ലാം മതത്തില്‍ നിന്നൊക്കെ മാറി പഴയ അഖിലയായി എന്നായിരുന്നു.
എന്നാല്‍, ഹാദിയയുടെ പിതാവിന്റെ ഈ വാക്ക് പച്ചക്കള്ളമാണെന്ന കാര്യം രാഹുലിന്റെ വിഡിയോ വഴി എല്ലാവര്‍ക്കും ബോധ്യപ്പെട്ടിരിക്കുകയാണ്. എന്ത് പ്രതിസന്ധി നേരിടേണ്ടിവന്നാലും ശരി, താന്‍ സ്വീകരിച്ച ഇസ്‌ലാം മത വിശ്വാസത്തില്‍ നിന്ന് മാറുകയില്ലെന്ന് ഹാദിയതന്നെ വ്യക്തമാക്കിയ സ്ഥിതിക്ക് അവരെ ആരും നിര്‍ബന്ധിച്ചതല്ലെന്ന് വ്യക്തമാണ്. ഹാദിയ വിശ്വസിച്ച മതത്തിന്റെ തത്ത്വം തന്നേ, മാതാപിതാക്കള്‍ മറ്റേതു മതത്തില്‍പ്പെട്ടവരായാലും അവരെ തള്ളിപ്പറയുകയോ നിന്ദിക്കുകയോ ചെയ്യരുത് എന്നാണ്. ഹാദിയ വിശ്വസിച്ച മതപ്രകാരം ജീവിക്കുന്നതിന് അവരുടെ മതാപിതാക്കള്‍ എന്തിനാണ് എതിര് നില്‍ക്കുന്നത്. ഹാദിയ അവരുടെ മാതാപിതാക്കളോട് വിഡിയോയില്‍ പറഞ്ഞത് - എപ്പോഴും എന്നെ ഇങ്ങനെ ദ്രോഹിച്ച് കൊണ്ട് ജീവിപ്പിക്കുകയാണോ എന്നാണ്.