തൃശൂര്‍: സി.ബി.എസ്.ഇ സംസ്ഥാന കലോത്സവം നവംബര്‍ 23, 24, 25 തിയതികളില്‍ തൃശൂരില്‍ നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു. ചിറ്റിലപ്പിള്ളി ഐ.ഇ.എസ് പബ്ലിക് സ്‌കൂളിലാണ് 10 ാമത് കലോത്സവത്തിന് അരങ്ങൊരുങ്ങുക. കലോത്സവ ലോഗോയുടെ പ്രകാശനം സംവിധായകന്‍ സത്യന്‍ അന്തിക്കാട് നിര്‍വഹിച്ചു. കേരളത്തിലെ 24 സഹോദയകളുടെ സംസ്ഥാനതല സംഘടനയായ കോണ്‍ഫെഡറേഷന്‍ ഓഫ് കേരള സഹോദയ കോംപ്ലക്‌സസ് ആണ് കലോത്സവത്തിന്റെ സംഘാടകര്‍. സഹോദയ മത്സരങ്ങളിലെ ഒന്നും രണ്ടും സ്ഥാനക്കാര്‍ നാല് കാറ്റഗറികളില്‍ മത്സരിക്കും. ചിറ്റിലപ്പിള്ളി ഐ.ഇ .എസ് പബ്ലിക് സ്‌കൂളില്‍ നടന്ന വാര്‍ത്താ സമ്മേളനത്തില്‍ സി.കെ.എസ്.സി പ്രസിഡന്റ് കെ ഉണ്ണികൃഷ്ണന്‍, ജനറല്‍ സെക്രട്ടറി കെ.എ ഫ്രാന്‍സിസ്, തൃശൂര്‍ സഹോദയ പ്രസിഡന്റ് മുഹമ്മദ് റഷീദ്, ഐ.ഇ.എസ് പ്രിന്‍സിപ്പല്‍ ലത പ്രകാശ് സംബന്ധിച്ചു.