മലപ്പുറം: രാജ്യത്തെ തന്നെ ആദ്യ കായിക ഗ്രന്ഥാലയത്തിന് കൊണ്ടോട്ടി മേലങ്ങാടി ഗവ. വൊക്കേഷനല്‍ ഹയര്‍സെക്കന്‍ഡറി സ്‌കൂളില്‍ തുടക്കം. ലൈബ്രറി ഉദ്ഘാടനം കാലിക്കറ്റ് സര്‍വകലാശാല കായികവിഭാഗം മേധാവി ഡോ. വി.പി സക്കീര്‍ ഹുസൈന്‍ നിര്‍വഹിച്ചു.
2011-12 വര്‍ഷത്തെ പൂര്‍വ വിദ്യാര്‍ഥികളുടെ സഹകരണത്തോടെ സ്‌കൂള്‍ കായികവേദി കാംപസില്‍തന്നെ പ്രത്യേകം സജ്ജീകരിച്ച ലൈബ്രറിയില്‍ പുസ്തകങ്ങള്‍ക്കുപുറമെ കായിക ആനുകാലിക പ്രസിദ്ധീകരണങ്ങളുടെ ശേഖരണത്തോടുകൂടിയ വായനശാലയും ഉണ്ട്. വിവിധ മേഖലകളിലെ നിരവധി ഗ്രന്ഥങ്ങള്‍ ശേഖരിച്ചുകഴിഞ്ഞു. കായികാധ്യാപകന്‍ മുഹമ്മദ് ഷാജഹാന്റെ നേതൃത്വത്തിലാണ് പദ്ധതി ആസൂത്രണം ചെയ്തത്.
ഹയര്‍സെക്കന്‍ഡറി പ്രിന്‍സിപ്പല്‍ ജൂഡ് ലൂയിസ് കായികവേദിയുടെ ഉദ്ഘാടനവും, വി.എച്ച്.എസ്.ഇ പ്രിന്‍സിപ്പല്‍ മഹിമ ആരോഗ്യ കായിക വാര്‍ത്താ ബോര്‍ഡിന്റെ ഉദ്ഘാടനവും നിര്‍വഹിച്ചു. പി.കെ അബ്ദുസലാം, മനോജ്, എം.എ അഷ്‌റഫ്, വി.പി നസീറ, സുല്‍ത്താന്‍, ഹനീഫ മാസ്റ്റര്‍, മുഹമ്മദ് ഷാജഹാന്‍, അബ്ദുല്‍ഗഫൂര്‍ സംസാരിച്ചു.