നെയ്യാറ്റിന്‍കര: നെയ്യാര്‍ മേളയോടനുബന്ധിച്ച് ഓഗസ്റ്റ് 18, 19, 20 തിയതികളില്‍ പഴയ ഉച്ചക്കട കാരയ്ക്കാവിള ഗ്രൗണ്ടില്‍ ജില്ലാ തല കബഡി മത്സരം സംഘടിപ്പിച്ചു. ജൂനിയര്‍-സീനിയര്‍ തലങ്ങളില്‍ സംഘടിപ്പിക്കപ്പെട്ട മത്സരം കെ.ആന്‍സലന്‍ എം.എല്‍.എ ഔപചാരികമായി ഉദ്ഘാടനം ചെയ്തു. കാരോട് പഞ്ചായത്ത് പ്രസിഡന്റ് ബി.അനിത അധ്യക്ഷത വഹിച്ച യോഗത്തില്‍ ജില്ലാ- ബ്ലോക്ക്-പഞ്ചായത്ത് തല നേതാക്കളും വിവിധ രാഷ്ട്രീയ-സാമൂഹ്യ-സാംസ്‌കാരിക പ്രവര്‍ത്തകരും പങ്കെടുത്തു. ജില്ലാതല മത്സരത്തില്‍ പഴയ ഉച്ചക്കട ഹെര്‍കുലിയന്‍ സ്‌കൂള്‍ ഒഫ് കബഡി ഒന്നാം സ്ഥാനവും ദീപം വെള്ളറട രണ്ടാം സഥാനവും നേടി.
മേളയോടനുബന്ധിച്ച് ഓഗസ്റ്റ് 20, 21, 22, 23 തിയതികളില്‍ നടക്കുന്ന ജില്ലാതല വോളിബോള്‍ ടൂര്‍ണ്ണമെന്റിന്റെ ഔപചാരികമായ ഉദ്ഘാടനം ശാസ്താംതല യു.പി.എസ് ഫ്‌ളഡ് ലൈറ്റ് ഗ്രൗണ്ടില്‍ കെ.ആന്‍സലന്‍ എം.എല്‍.എ നിര്‍വഹിച്ചു.
ചടങ്ങില്‍ മുന്‍സിപ്പല്‍ വൈസ് ചെയര്‍മാന്‍ ഷിബു , മേള ജനറല്‍ കണ്‍വീനര്‍ എം.ഷാനവാസ് , സ്‌പോര്‍ട്‌സ് കൗണ്‍സില്‍ മെമ്പര്‍ പ്രതീപ്കുമാര്‍ , കൗണ്‍സിലര്‍ സൗമ്യ തുടങ്ങിയവര്‍ സംബന്ധിച്ചു. നാല് ദിവസം നീളുന്ന വോളിബോള്‍ ടൂര്‍ണ്ണമെന്റ് 23 ന് സമാപിക്കും.