ഗ്ലാസ്‌ഗോ: ലോക ബാഡ്മിന്റണ്‍ ചാംപ്യന്‍ഷിപ്പിലെ ഇന്ത്യന്‍ മുന്നേറ്റം തുടരുന്നു. മെഡല്‍ പ്രതീക്ഷകളുമായി ഇന്ത്യയുടെ സൈന നേഹ്‌വാള്‍, കിഡംബി ശ്രീകാന്ത്, ബി സായ് പ്രണീത് എന്നിവര്‍ പ്രീ ക്വാര്‍ട്ടറിലേക്ക് മുന്നേറി.
സ്വിറ്റ്‌സര്‍ലന്‍ഡ് താരം സബ്രിന ജക്ക്വറ്റിനെ ഏകപക്ഷീയ പോരാട്ടത്തില്‍ കീഴടക്കിയാണ് സൈന വിജയം സ്വന്തമാക്കിയത്. അര മണിക്കൂര്‍ മാത്രം നീണ്ട മത്സരത്തില്‍ 21-11, 21-12 എന്ന സ്‌കോറിനാണ് 12ാം സീഡായ സൈന വിജയം സ്വന്തമാക്കിയത്. പ്രീ ക്വാര്‍ട്ടറില്‍ സങ് ജി ഹ്യുനാണ് സൈനയുടെ എതിരാളി. ഇന്ത്യയുടെ തന്‍വി ലഡിനെ പരാജയപ്പെടുത്തിയാണ് സങ് പ്രീ ക്വാര്‍ട്ടറിലെത്തിയത്.
ലോക എട്ടാം നമ്പര്‍ താരമായ കെ ശ്രീകാന്ത് ക്ലിനിക്കല്‍ പോരാട്ടത്തിലൂടെ ഫ്രാന്‍സിന്റെ ലൂക്കാസ് കോര്‍വിയേയാണ് വീഴ്ത്തിയത്. ശ്രീകാന്തും ഏകപക്ഷീയമായാണ് മത്സരം സ്വന്തമാക്കിയത്. സ്‌കോര്‍: 21-9, 21-17. ഇന്ന് നടക്കുന്ന പോരാട്ടത്തില്‍ ശ്രീകാന്ത് ഡെന്‍മാര്‍കിന്റെ ആന്‍ഡേഴ്‌സ് ആന്‍ഡന്‍സനുമായി ഏറ്റുമുട്ടും.
ആദ്യ സെറ്റ് കൈവിട്ട ശേഷം രണ്ടും മൂന്നും സെറ്റുകളില്‍ തിരിച്ചടിച്ച് മത്സരം പിടിച്ചെടുത്താണ് സായ് പ്രണീത് വിജയിച്ചത്. ഇന്തോനേഷ്യന്‍ താരം ആന്റണി സിനിസുക ജിന്‍ഡിങിനെയാണ് സായ് വീഴ്ത്തിയത്. സ്‌കോര്‍: 14-21, 21-18, 21-19.
അതേസമയം ഇന്ത്യയുടെ പുരുഷ, വനിതാ ഡബിള്‍സ് സഖ്യമായ അര്‍ജുന്‍ എം.ആര്‍- രാമചന്ദ്രന്‍ ശ്ലോക് സഖ്യവും വനിതാ സഖ്യമായ മേഘ്‌ന ജക്കംപുതി- പൂര്‍വിഷ റാം സഖ്യവും തോല്‍വിയോടെ പുറത്തായി.