അരിമ്പൂര്‍: ഓണ കായവിപണിയിലെ ഗ്ലാമര്‍ താരമായ ചെങ്ങാലിക്കോടന്‍ നേന്ത്ര കായകള്‍ മോഷണം പോകുന്നതായി പരാതി. മനക്കൊടി തെക്കേയറ്റം പുളിക്കപറമ്പില്‍ വിജയന്റെ വാഴതോട്ടത്തില്‍ നിന്നാണ് ചെങ്ങാലിക്കോടന്‍ മോഷണം നടന്നത്. മനക്കൊടി പ്രദേശങ്ങളില്‍ ഇത്തരം നിരവധി വാഴതോട്ടങ്ങളില്‍ നൂറ് കണക്കിന് കുലകളാണ് വിളവെടുപ്പിന് പാകമായി നില്‍ക്കുന്നത്. ഇവിടെ മോഷണത്തിന് തന്ത്രപരമായ നീക്കങ്ങളാണ് കായ കള്ളന്മാര്‍ പയറ്റുന്നത്. ഒരു തോട്ടത്തിലെ നൂറ് കണക്കിന് കുലകളില്‍ നിന്ന് രണ്ടോ മൂന്നോകുലകള്‍ വെട്ടിമാറ്റിയുള്ള കളവാണ് ഇവര്‍ പയറ്റുന്നത്. ചെറു നഷ്ടമെന്നതിനാല്‍ ഉടമ കേസിനൊന്നും പോകില്ല. കള്ളന്മാരെ സംബന്ധിച്ചിടത്തോളം ഇത് കൂടുതല്‍ കളവിനുള്ള പ്രചോദനമായി മാറുന്നുവെന്നതാണ് വസ്തുത.