കോഴിക്കോട്: ടൗണ്‍ഹാളിനെയും ആര്‍ട്ട് ഗാലറിയെയും ഇരുമ്പുവേലി കെട്ടി വേര്‍തിരിച്ച നടപടിക്കെതിരേ സാംസ്‌കാരിക കൂട്ടായ്മ പ്രതിഷേധിച്ചു. ഇന്നലെയാണ് നഗരത്തിലെ സാംസ്‌കാരിക പ്രവര്‍ത്തകര്‍ ഒരു പകല്‍ ദീര്‍ഘിച്ച പ്രതിഷേധം സംഘടിപ്പിച്ചത്.

സാംസ്‌കാരിക ഇടങ്ങളില്‍ മതിലുകള്‍ തീര്‍ക്കുന്ന കോഴിക്കോട് കോര്‍പറേഷന്‍ അധികൃതരുടെ നടപടിക്കെതിരേ സാംസ്‌കാരിക പ്രവര്‍ത്തകരുടെ പ്രതിഷേധം എന്ന ബാനറിലായിരുന്നു കവികളും എഴുത്തുകാരും ചിത്രകാരും ഉള്‍പ്പെട്ട സാംസ്‌കാരിക പ്രവര്‍ത്തകര്‍ കവിത ചൊല്ലിയും ചിത്രം വരച്ചും പ്രസംഗിച്ചും സംഗീതോപകരണങ്ങള്‍ മീട്ടിയും പ്രതിഷേധിച്ചത്. ആര്‍ട്ട് ഗാലറിയെയും ടൗണ്‍ഹാളിനെയും വേര്‍തിരിച്ച് ഇരുമ്പ് കവാടം സ്ഥാപിച്ച നടപടി ഫാസിസ്റ്റ് രീതിയാണെന്ന് അനില്‍ കുമാര്‍ തിരുവോത്ത് അഭിപ്രായപ്പെട്ടു. സാമൂഹികമായ കൂടിച്ചേരലുകള്‍ ഇല്ലാതാക്കുന്ന ഇത്തരം നടപടിയെ മറ്റൊരു വാക്കിനാലും വിശേഷിപ്പിക്കാനാവില്ല.
ടൗണ്‍ ഹാളിനെയും ആര്‍ട്ട് ഗാലറിയെയും വേര്‍തിരിച്ച് മതിലുയര്‍ന്നപ്പോള്‍ ചിത്രകാരന്‍ പോള്‍ കല്ലാനോടിന്റെ നേതൃത്വത്തില്‍ സാംസ്‌കാരിക പ്രവര്‍ത്തകര്‍ മേയര്‍ തോട്ടത്തില്‍ രവീന്ദ്രനെ കണ്ട് വിഷയം ചര്‍ച്ച ചെയ്യുകയും മതില്‍ തല്‍ക്കാലം നിര്‍മിക്കില്ലെന്ന് ഉറപ്പ് നല്‍കുകയും ചെയ്തിരുന്നു. എന്നാല്‍ ഈ വാഗ്ദാനം പരസ്യമായി ലംഘിച്ചാണ് കഴിഞ്ഞ ദിവസം ഇരു കേന്ദ്രങ്ങളെയും വേര്‍തിരിച്ച് ഇരുമ്പ് ഗേറ്റ് സ്ഥാപിച്ചിരിക്കുന്നത്. ഇത് അംഗീകരിക്കാവുന്നതല്ല. സ്ഥലപരിമിതിയാല്‍ വീര്‍പ്പുമുട്ടുന്ന രണ്ട് സാംസ്‌കാരിക കേന്ദ്രങ്ങളെയും വേര്‍തിരിച്ച് മതിലും ഗേറ്റും സ്ഥാപിക്കുന്നത് ജനങ്ങള്‍ക്ക് ഒത്തുചേരുന്നതിന് തടസം സൃഷ്ടിക്കും.
കഴിഞ്ഞ ദിവസം ഫോക് ലോര്‍ അക്കാദമി സംഘടിപ്പിച്ച പരിപാടിയില്‍ പങ്കെടുത്തവര്‍ക്ക് അങ്ങോട്ടും ഇങ്ങോട്ടും സഞ്ചരിക്കാന്‍ പുതിയ ഗേറ്റ് സ്ഥാപിച്ചത് വലിയ പ്രതിസന്ധി സൃഷ്ടിച്ചതായും അനില്‍ ചൂണ്ടിക്കാട്ടി.
സതീഷ് കെ. സതീഷ്, സിവിക് ചന്ദ്രന്‍, ചിത്രകാരന്‍ ഗണേഷ്, നവീന്‍ രാജ്, ഗുലാബ്, സജില്‍ കുമാര്‍, ഷാജി കല്ലായി, നദീര്‍, വല്‍സന്‍ മാത്യു പങ്കെടുത്തു.