തൊട്ടില്‍പ്പാലം: നിയന്ത്രണം വിട്ട കാര്‍ നിര്‍ത്തിയിട്ട മറ്റൊരു കാറിനെ ഇടിച്ച് കുടംബത്തിലെ മൂന്നുപേര്‍ക്ക് പരുക്ക്. സംസ്ഥാനപാതയില്‍ മൂന്നാംകൈ വളവില്‍ ഇന്നലെ രാവിലെ ഒന്‍പതോടെയാണ് സംഭവം.
നിര്‍ത്തിയിട്ട കാറിലുണ്ടായിരുന്ന മണലോടി വീട്ടില്‍ സക്കരിയ്യ (25), മാതാവ് സാറ (42), സാറയുടെ ഭര്‍തൃപിതാവ് ബിയ്യാത്തു (74) എന്നിവര്‍ക്കാണ് പരുക്കേറ്റത്.
സാരമായി പരുക്കേറ്റ ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. വയനാട്ടില്‍ നിന്നു തൊട്ടില്‍പ്പാലം ഭാഗത്തേക്കു വരികയായിരുന്ന സ്വിഫ്റ്റ് കാറാണ് നിയന്ത്രണം വിട്ടത്. കരിങ്ങാട് റോഡിനോട് ചേര്‍ന്ന ഓവുചാലിന്റെ കരിങ്കല്‍ ഭിത്തിയും തകര്‍ത്ത് നിര്‍ത്തിയിട്ടിരുന്ന മാരുതി എണ്ണൂറിനെ ഇടിക്കുകയായിരുന്നു. സ്വിഫ്റ്റ് കാറിന്റെ അമിതവേഗതയാണ് അപകടത്തിന് കാരണമെന്ന് നാട്ടുകാര്‍ പറഞ്ഞു.
ഇതേ സ്ഥലത്ത് കഴിഞ്ഞയാഴ്ച അമിതവേഗതയെ തുടര്‍ന്ന് വിവാഹസംഘം സഞ്ചരിച്ച കാര്‍ അപകടത്തില്‍പ്പെട്ടിരുന്നു.