പുതുക്കാട്: രണ്ട് കിലോ കഞ്ചാവുമായി മധ്യവയസ്‌ക പിടിയിലായി. ദേവികുളം ആനവിരട്ടി എട്ടേക്കര്‍ അറുപതാം മൈലില്‍ വാര്‍മുളത്തു വീട്ടില്‍ ലളിത സുരേഷ് (50) ആണ് പിടിയിലായത്. ശനിയാഴ്ച രാത്രി 7.45 ഓടെ പുതുക്കാട് കെ.എസ്.ആര്‍.ടി.സി ബസ് സ്റ്റാന്റിനു സമീപത്തു നിന്നും അസിസ്റ്റന്റ് എക്‌സൈസ് കമ്മിഷണര്‍ കെ സജിയുടെ നേതൃത്വത്തിലുള്ള സ്‌പെഷ്യല്‍ സ്‌ക്വാഡ് സംഘം അറസ്റ്റ് ചെയ്തത്. തമിഴ്‌നാട്ടിലെ പഴനി കേന്ദ്രീകരിച്ചു വന്‍കിട കഞ്ചാവ് കച്ചവടക്കാരില്‍ നിന്നും കഞ്ചാവ് വാങ്ങി കേരളത്തില്‍ എത്തിക്കുന്ന ശൃംഖലയിലെ കണ്ണിയാണ് ലളിത. ഓണം പ്രമാണിച്ച് വാഹന പരിശോധന ശക്തമാക്കിയതിനാല്‍ ചെറുപ്പക്കാരെ ഉപയോഗിച്ച് ഇരു ചക്രവാഹനങ്ങളിലും മറ്റും കഞ്ചാവ് കടത്തി ആവശ്യക്കാര്‍ക്കെത്തിച്ചു കൊടുക്കുന്ന പതിവ് രീതി മാറ്റി പഴനിയില്‍ നിന്നും പൊള്ളാച്ചിയില്‍ എത്തിയ ശേഷം അവിടെ നിന്നും കെ.എസ്.ആര്‍.ടി.സി ബസിലാണ് ഇവര്‍ കഞ്ചാവ് കൊണ്ടുവന്നത്. മറ്റുള്ളവരെ അപേക്ഷിച്ച് മിതമായ വിലയില്‍ കഞ്ചാവ് സുരക്ഷിതമായി എത്തിക്കുന്നതിനാല്‍ ധാരാളം കഞ്ചാവ് കച്ചവടക്കാര്‍ ഇവരെ സമീപിക്കാറുണ്ടെന്ന് എക്‌സൈസ് ഉദ്യോഗസ്ഥര്‍ പറഞ്ഞു. മറ്റുള്ളവര്‍ ഒരു കിലോ കഞ്ചാവ് തൃശൂരില്‍ എത്തിച്ചു കൈമാറുന്നതിന് 18000 രൂപ വാങ്ങുമ്പോള്‍ ഇവര്‍ 15000 രൂപയാണ് വാങ്ങുന്നത്. മാള ആസ്ഥാനമാക്കി പ്രവര്‍ത്തിക്കുന്ന സെന്റര്‍ ഓഫ് കേരള കമ്മിഷന്‍ ഏജന്റ്‌സ് അസോസിയേഷന്‍ അംഗമായിരുന്ന ഇവര്‍ക്ക് ത്യശൂരിലെ നിരവധി കഞ്ചാവ് കച്ചവടക്കാരുമായി ബന്ധമുണ്ടെന്ന് സംശയിക്കുന്നു. കൊടകര സ്വദേശി രഞ്ജിത്തിന് കൈമാറാനാണ് ഇവര്‍ ഇത്തവണ കഞ്ചാവുമായി എത്തിയത്. രഞ്ജിത് നേരിട്ട് പുതുക്കാട് എത്തുമെന്നാണ് അറിയിച്ചിരുന്നത്. രഞ്ജിത്തിന് വേണ്ടി എക്‌സൈസ് അധികുതര്‍ അന്വേഷണം ആരംഭിച്ചു. തൃശൂര്‍ ഡെപ്പ്യുട്ടി എക്‌സൈസ് കമ്മിഷണര്‍ ടി.വി റാഫേലിന് ലഭിച്ച രഹസ്യ വിവരമനുസരിച്ച് ഒരു മാസത്തിലേറെയായി ഇവര്‍ ഷാഡോ എക്‌സൈസ് സംഘത്തിന്റെ നിരീക്ഷണത്തിലായിരുന്നു. എക്‌സൈസ് സി.ഐ ഹരികൃഷ്ണപിള്ള, ഇന്‍സ്‌പെക്ടര്‍ എസ് ശ്രീകുമാര്‍, പ്രിവന്റീവ് ഓഫിസര്‍മാരായ ജിന്റോ ജോണ്‍, തോമസ് ദേവസി, സിവില്‍ എക്‌സൈസ് ഓഫിസര്‍മാരായ ടി.എസ് സുരേഷ്, റെനില്‍ രാജന്‍, സി.ബി സന്തോഷ് , വി.ബി ശ്രീജിത്ത്, കെ.എന്‍ ജിനേഷ്, എ.കെ ദുര്‍ഗ്ഗാ പങ്കെടുത്തു.