കോട്ടയം: രാഷ്ട്രീയ രംഗത്തും പൊതു പ്രവര്‍ത്തന രംഗത്തും തീര്‍ത്തും വിശ്വസ്തനായിരുന്നു ഉഴവൂര്‍ വിജയനെന്ന് മുന്‍ മുഖ്യമന്ത്രി ഉമ്മന്‍ ചാണ്ടി അഭിപ്രായപ്പെട്ടു. മൂല്യാധിഷ്ഠിത രാഷ്ട്രീയത്തിനും സംശുദ്ധ പൊതുപ്രവര്‍ത്തനത്തിനും ഉദാത്ത മാതൃകയായിരുന്നു വിജയന്‍. പ്രസംഗത്തില്‍ ഏറ്റവും കൂടുതല്‍ എന്നെയാണ് വിമര്‍ശിക്കുകയും കളിയാക്കുകയും ചെയ്തിരുന്നതെങ്കിലും ജീവിതാവസാനം വരെ വ്യക്തി ബന്ധം കാത്തു സൂക്ഷിക്കാന്‍ കഴിഞ്ഞു. കോണ്‍ഗ്രസ് പിളര്‍ന്നപ്പോള്‍ എന്റെ ഏറ്റവും വലിയ നഷ്ടം വിജയന്‍ ഇടതുപാളയത്തിലേക്ക് പോയതാണ്.വിജയന് ഉചിതമായ സ്മാരകം നിര്‍മിക്കണമെന്നും അദ്ദേഹം അഭിപ്രായപ്പെട്ടു.ഉഴവൂര്‍ വിജയന്‍ ഫൗണ്ടേഷന്റെ ആഭിമുഖ്യത്തില്‍ കോട്ടയം പ്രസ് ക്ലബ് ഹാളില്‍ നടന്ന അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.