കൊച്ചി: ഭോപ്പാല്‍ ജയിലില്‍ നിന്ന് തങ്ങളെ കേരളത്തിലെ ഏതെങ്കിലും ജയിലിലേക്ക് മാറ്റണമെന്നാവശ്യപ്പെട്ട് വാഗമണ്‍ സിമി ക്യാംപ് കേസില്‍ വിചാരണ നേരിടുന്ന 11 പ്രതികള്‍ നല്‍കിയ ഹരജി ഹൈക്കോടതി തള്ളി. ഹരജിയിലെ ആവശ്യം അനുവദിക്കരുതെന്ന് കേന്ദ്ര സര്‍ക്കാരുള്‍പ്പെടെ കേസിലെ എതിര്‍ കക്ഷികള്‍ കോടതിയില്‍ ആവശ്യപ്പെട്ടിരുന്നു. ഇതു കണക്കിലെടുത്താണ് ഹരജികള്‍ തള്ളിയത്. ഈരാറ്റുപേട്ട സ്വദേശികളായ ഷാദുലി, ഷിബിലി, ആലുവ സ്വദേശി മുഹമ്മദ് അന്‍സാര്‍, ബംഗളൂരു സ്വദേശികളായ ഹാഫിസ് ഹുസൈന്‍, മുഹമ്മദ് യാസിര്‍, മിര്‍സ അഹമ്മദ് ബേഗ്, മധ്യപ്രദേശില്‍ നിന്നുള്ള സഫ്ദര്‍ ഹുസൈന്‍, അമില്‍ പര്‍വേസ്, കമ്രാന്‍ സിദ്ദിഖി, കമറുദ്ദീന്‍ നഗോറി, മുംബയ് അന്ധേരി സ്വദേശി മുഹമ്മദ് അബു ഫൈസല്‍ ഖാന്‍ എന്നിവരാണ് ഹരജി നല്‍കിയത്.
ക്രൂരമായ പീഡനമാണ് ഭോപ്പാല്‍ ജയിലില്‍ നേരിടേണ്ടി വരുന്നതെന്നും സിമി പ്രവര്‍ത്തകരെന്നാരോപിച്ച് ജയിലിലടച്ചവരില്‍ എട്ടുപേര്‍ ജയിലില്‍ അടുത്തിടെ വെടിയേറ്റു മരിച്ചെന്നും ഹരജിക്കാര്‍ ചൂണ്ടിക്കാട്ടിയിരുന്നു. വാഗമണ്‍ കേസിന്റെ വിചാരണയില്‍ ഫലപ്രദമായി പങ്കെടുക്കാന്‍ തങ്ങളെ കേരളത്തിലെ ജയിലിലേക്ക് മാറ്റണമെന്നായിരുന്നു ഇവരുടെ മുഖ്യ ആവശ്യം. എന്നാല്‍ ആവശ്യം കോടതി അനുവദിച്ചില്ല.