കോഴിക്കോട്: കെ.സി അബു അഭ്യര്‍ഥിച്ചു, മന്ത്രി കടന്നപ്പള്ളി രാമചന്ദ്രന്‍ പാടി. ജില്ലാ ടൂറിസം പ്രമോഷന്‍ കൗണ്‍സില്‍ ഓണാഘോഷ പരിപാടിയുടെ ഉദ്ഘാടന വേദിയിലാണ് മന്ത്രി കടന്നപ്പള്ളി രാമചന്ദ്രന്‍ ഗാനമാലപിച്ചത്. 'കേരളം... കേരളം... കേളികൊട്ടുയരുന്ന കേരളം' എന്ന ഗാനമാണ് മന്ത്രി പാടിയത്. ഉദ്ഘാടന ചടങ്ങില്‍ ആശംസകനായെത്തിയ കോണ്‍ഗ്രസ് നേതാവ് കെ.സി അബുവാണ് മുന്‍പു നടന്ന ഓണാഘോഷ ചടങ്ങില്‍ അന്നു മന്ത്രിയായിരുന്ന ഡോ. എം.കെ മുനീര്‍ പാട്ടുപാടിയത് ഓര്‍ത്തെടുത്തത്. ഈ മന്ത്രിസഭയിലെ പാട്ടുകാരനായ കടന്നപ്പള്ളി പാടണമെന്ന അഭ്യര്‍ഥനയും അദ്ദേഹം നടത്തി. ഇതോടെയാണ് താന്‍ ഒരു പാട്ട് പാടാമെന്ന് കടന്നപ്പള്ളി സമ്മതിച്ചത്. ഇക്കാര്യം അദ്ദേഹത്തിന്റെ സഹപ്രവര്‍ത്തകന്‍ കൂടിയായ മന്ത്രി ടി.പി രാമകൃഷ്ണന്‍ പ്രഖ്യാപിക്കുകയും ചെയ്തു.
ഉദ്ഘാടന ചടങ്ങ് കഴിഞ്ഞയുടനെ കടന്നപ്പള്ളി രാമചന്ദ്രന്‍ ഗാനമാലാപിക്കുകയായിരുന്നു. നിറഞ്ഞ ഹര്‍ഷാരവത്തോടെയാണ് സദസ് മന്ത്രിയുടെ ഗാനം ശ്രവിച്ചത്.