ചിറ്റഗോങ്: ബംഗ്ലാദേശിനെതിരായ രണ്ടാം ക്രിക്കറ്റ് ടെസ്റ്റില്‍ ആസ്‌ത്രേലിയ പൊരുതുന്നു. ബംഗ്ലാദേശിന്റെ ഒന്നാം ഇന്നിങ്‌സ് 305 റണ്‍സില്‍ അവസാനിപ്പിച്ച് ഒന്നാം ഇന്നിങ്‌സ് തുടങ്ങിയ ഓസീസ് രണ്ടാം ദിനം കളി നിര്‍ത്തുമ്പോള്‍ രണ്ട് വിക്കറ്റ് നഷ്ടത്തില്‍ 225 റണ്‍സെന്ന നിലയില്‍. എട്ട് വിക്കറ്റുകള്‍ ശേഷിക്കേ ബംഗ്ലാ സ്‌കോറിനൊപ്പമെത്താന്‍ ഓസീസിന് 80 റണ്‍സ് കൂടി വേണം.
ഓപണര്‍ ഡേവിഡ് വാര്‍ണര്‍ (88), ഹാന്‍ഡ്‌സ്‌കോംപ് (69) എന്നിവര്‍ പുറത്താകാതെ ക്രീസില്‍ നില്‍ക്കുന്നത് ആസ്‌ത്രേലിയക്ക് പ്രതീക്ഷ നല്‍കുന്നു. നായകന്‍ സ്മിത്ത് (58), റെന്‍ഷോ (നാല്) എന്നിവരുടെ വിക്കറ്റുകളാണ് ഓസീസിന് നഷ്ടമായത്.
നേരത്തെ മുഷ്ഫിഖര്‍ റഹിം (68), സബ്ബിര്‍ റഹ്മാന്‍ (66) എന്നിവരുടെ ബാറ്റിങാണ് ബംഗ്ലാ ഇന്നിങ്‌സിന് തുണയായത്. ഓസീസിനായി സ്പിന്നര്‍ നതാന്‍ ലിയോണ്‍ ഏഴ് വിക്കറ്റുകളുമായി തിളങ്ങി.