കൊളംബോ: സെഞ്ച്വറിയുമായി ക്യാപ്റ്റന്‍ വിരാട് കോഹ്‌ലി ബാറ്റ് കൊണ്ടും ഏകദിനത്തിലെ കന്നി അഞ്ച് വിക്കറ്റ് പ്രകടവുമായി ഭുവനേശ്വര്‍ കുമാര്‍ പന്ത് കൊണ്ടും ഇന്ദ്രജാലം പുറത്തെടുത്തപ്പോള്‍ ശ്രീലങ്കയ്‌ക്കെതിരായ അഞ്ചാം ഏകദിനത്തിലും ജയം നേടി ടെസ്റ്റ് പരമ്പരയ്ക്ക് പിന്നാലെ ഏകദിന പരമ്പരയും ടീം ഇന്ത്യ തൂത്തുവാരി. ആറ് വിക്കറ്റിനാണ് ഇന്ത്യയുടെ വിജയം. 239 എന്ന വിജയ ലക്ഷ്യം മൂന്ന് വിക്കറ്റ് നഷ്ടത്തില്‍ 47ാം ഓവറില്‍ ഇന്ത്യ മറികടന്നു. 116 പന്തില്‍ 110 റണ്‍സെടുത്ത് കോഹ്‌ലി പുറത്താകാതെ നിന്ന് മുന്നില്‍ നിന്ന് നയിച്ചു. കേദാര്‍ ജാദവ് (63) മനീഷ് പാണ്ഡെ (36) എന്നിവരും തിളങ്ങി. ഏകദിനത്തിലെ 30ാം സെഞ്ച്വറി തികച്ച കോഹ്‌ലി ഏറ്റവും കൂടുതല്‍ ഏകദിന സെഞ്ച്വറികള്‍ നേടുന്ന താരങ്ങളുടെ പട്ടികയില്‍ രണ്ടാം സ്ഥാനത്തെത്തി. മുന്‍ ഓസീസ് നായകന്‍ റിക്കി പോണ്ടിങിനൊപ്പമാണ് കോഹ്‌ലി ഇപ്പോള്‍ രണ്ടാമതുള്ളത്. 49 സെഞ്ച്വറികളുമായി ഇതിഹാസ താരം സച്ചിനാണ് ഒന്നാമത്.
ടോസ് നേടിയ ലങ്ക ബാറ്റിങ് തിരഞ്ഞെടുക്കുകയായിരുന്നു. ആശ്വാസ ജയത്തിനിറങ്ങിയ ലങ്ക രണ്ട് പന്ത് മാത്രം ശേഷിക്കേ ഓള്‍ ഔട്ടായി. ഭുവനേശ്വര്‍ കുമാറിന്റെ ഉജ്ജ്വല പ്രകടനമാണ് ലങ്കന്‍ സ്‌കോര്‍ 250 കടക്കാതെ പിടിച്ചുനിര്‍ത്തിയത്. 42 റണ്‍സ് മാത്രം വഴങ്ങി ഭുവി അഞ്ച് വിക്കറ്റുകള്‍ വീഴ്ത്തി. വിക്കറ്റ് വേട്ടയ്ക്ക് തുടക്കമിട്ട ഭുവനേശ്വര്‍ കുമാര്‍ തന്നെ മലിംഗയെ വീഴ്ത്തി ലങ്കന്‍ ഇന്നിങ്‌സിന് അവസാനവും കുറിച്ചു.