ന്യൂഡല്‍ഹി: കോണ്‍ഗ്രസ് അധ്യക്ഷ സോണിയാ ഗാന്ധിയുടെ പ്രത്യേക സുരക്ഷാ സംഘത്തിലെ കമാന്‍ഡര്‍ രാകേഷ് കുമാറിനെ കണ്ടെത്തി. അഞ്ചു ദിവസം മുന്‍പാണ് ഇയാള്‍ അപ്രത്യക്ഷനായത്. രാകേഷിനെ പൊലിസ് ചോദ്യം ചെയ്തു വരികയാണെന്ന് ഡല്‍ഹി ഡി.സി.പി ബി.കെ സിങ് പറഞ്ഞു. ഇയാളെ കണ്ടെത്തിയതുമായി ബന്ധപ്പെട്ട വിശദവിവരങ്ങള്‍ പുറത്തുവിട്ടിട്ടില്ല.

സെപ്റ്റംബര്‍ മൂന്നു മുതലാണ് രാകേഷ് കുമാര്‍ (31) എന്ന കമാന്‍ഡോയെ കാണാതായത്. സാണിയയുടെ ഔദ്യോഗിക വസതിയായ ജന്‍പഥ് 10-ാം നമ്പര്‍ വസതിയില്‍ വന്നതിനു ശേഷമാണ് ഇയാളെ കാണാതാവുന്നത്. സര്‍വീസ് റിവോള്‍വറും മൊബൈല്‍ ഫോണും താമസ സ്ഥലത്ത് ഉപേക്ഷിച്ചാണ് ഇയാള്‍ പോയിരുന്നത്.

ഭാര്യയ്ക്കും രണ്ടു മക്കള്‍ക്കുമൊപ്പം ദ്വാരകയില്‍ വാടകവീട്ടിലാണ് ഇയാളുടെ താമസം. സെപ്റ്റംബര്‍ രണ്ടിന് രാകേഷ് വീട്ടിലെത്തിയില്ലെങ്കിലും അധിക ഡ്യൂട്ടി ഉള്ളതിനാലാണ് വരാതിരിക്കുന്നതെന്നാണ് കുടുംബാംഗങ്ങള്‍ ധരിച്ചത്. സെപ്റ്റംബര്‍ മൂന്നിനും രാകേഷ് വീട്ടിലെത്താതിരുന്നതോടെ വീട്ടുകാര്‍ മൊബൈലില്‍ ബന്ധപ്പെടാന്‍ ശ്രമിച്ചെങ്കിലും സാധിച്ചില്ല. തുടര്‍ന്ന് നടത്തിയ അന്വേഷണത്തിലാണ് ഇയാളെ കാണാതായെന്ന് മനസ്സിലായത്. തുടര്‍ന്ന് രാകേഷിന്റെ പിതാവ് നല്‍കിയ പരാതിയുടെ അടിസ്ഥാനത്തില്‍ പൊലിസ് അന്വേഷണം നടത്തുകയായിരുന്നു.