റിയാദ്: ഒരു വ്യാഴവട്ട കാലത്തിന് ശേഷം സഊദി അറേബ്യ ഫിഫ ലോകകപ്പ് ഫുട്‌ബോള്‍ ഫൈനല്‍ റൗണ്ടിലേക്ക് യോഗ്യത സ്വന്തമാക്കി. ഏഷ്യന്‍ യോഗ്യതാ റൗണ്ടണ്ടിലെ അവസാന മത്സരത്തില്‍ ജപ്പാനെ ഒരു ഗോളിന് തോല്‍പ്പിച്ചാണ് 2006ലെ ലോകകപ്പിന് ശേഷം സഊദി യോഗ്യത ഉറപ്പിച്ചത്. ഗ്രൂപ്പ് ബിയില്‍ നിന്ന് ജപ്പാന്‍ നേരത്തെ യോഗ്യത നേടിയിരുന്നു. സഊദിയുടെ ഫഹദ് അല്‍ മുവല്ലതാണ് ഏക ഗോള്‍ നേടി ടീമിന് വിജയം നേടിക്കൊടുത്തത്. ആസ്‌ത്രേലിയക്ക് തായ്‌ലന്‍ഡിനെ 2-1 നെ തോല്‍പ്പിക്കാനേ സാധിച്ചുള്ളൂ. അതോടെ ജപ്പാനെതിരേ സഊദി ഒരു ഗോളിനെങ്കിലും വിജയിക്കണമെന്ന നില വന്നു.
അത് കൃത്യമായി കളത്തില്‍ നടപ്പാക്കിയാണ് ടീം കുതിച്ചത്. കളിയുടെ 63ാം മിനുട്ടില്‍ പിറന്ന ഗോള്‍ സഊദിയെ ലക്ഷ്യത്തിലെത്തിച്ചു. എഴുപതിനായിരത്തോളം കാണികളാണ് ടീമിന്റെ കളി കാണാനായി സ്റ്റേഡിയത്തിലെത്തിയത്. സഊദി കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരനും കളി കാണാനെത്തിയിരുന്നു.
ഏഷ്യയില്‍ നിന്ന് അഞ്ച് ടീമുകള്‍ക്കാണ് ലോകകപ്പ് യോഗ്യത നേടാനുള്ള അവസരമുള്ളത്. ആദ്യ നാല് ടീമുകളായി ഇറാന്‍, ജപ്പാന്‍, സഊദി അറേബ്യ, ദക്ഷിണ കൊറിയ ടീമുകള്‍ സ്ഥാനമുറപ്പാക്കി. അഞ്ചാം സ്ഥാനക്കാരായി കയറാനുള്ള ടീമിന് ഇന്റര്‍ കോണ്‍ഫെഡറേഷന്‍ പ്ലേയോഫ് കളിച്ച് വിജയിച്ചാല്‍ മാത്രം യോഗ്യത നേടാം.
സഊദി ജപ്പാനെ കീഴടക്കി യോഗ്യത നേടിയതോടെ പ്രതീക്ഷയോടെ കുതിച്ചിരുന്ന ആസ്‌ത്രേലിയയാണ് വെട്ടിലായത്. ആസ്‌ത്രേലിയ പ്ലേയോഫ് കളിക്കണം. ഒപ്പം ആസ്‌ത്രേലിയയെ കൂടാതെ ഏഷ്യയില്‍ നിന്ന് സിറിയക്കുമാണ് ഇനി അവസരമുള്ളത്. ഒക്ടോബര്‍ ആദ്യം നടക്കുന്ന നാലാം റൗണ്ട് പോരാട്ടത്തില്‍ സിറിയ- ആസ്‌ത്രേലിയ ഏറ്റുമുട്ടും.
ഇരു പാദങ്ങളിലായി നടക്കുന്ന മത്സരം വിജയിക്കുന്ന ടീമിന് കോണ്‍കാകാഫ് മേഖലയിലെ നാലാം സ്ഥാനക്കാരുമായി പ്ലോയോഫില്‍ ഏറ്റുമുട്ടി വിജയം സ്വന്തമാക്കിയാല്‍ ലോകകപ്പ് ഫൈനല്‍ റൗണ്ടിലേക്ക് മുന്നേറാം.