മാള: കൊടുങ്ങല്ലൂര്‍ മാള കൊടകര തൃശൂര്‍ റൂട്ടിലും മാള അഷ്ടമിച്ചിറ ചാലക്കുടി റൂട്ടിലും വാഹനങ്ങള്‍ പെരുകിയതിനാലും റോഡിന്റെ അപാകതയാലും അഷ്ടമിച്ചിറയില്‍ ഗതാഗത കുരുക്ക് തുടര്‍ക്കഥയാകുന്നു. ഇക്കാരണങ്ങള്‍ കൂടാതെ ജംഗ്ഷനില്‍ വ്യാപാര സ്ഥാപനങ്ങള്‍ കൂടുന്നതനുസരിച്ച് വാഹന പാര്‍ക്കിംഗ് കൂടുന്നതും ഗതാഗത കുരുക്ക് ഏറുന്നതിന് കാരണമാകുന്നുണ്ട്.
വാഹനങ്ങളും വ്യാപാര സ്ഥാപനങ്ങളും ഓരോ വര്‍ഷവും കൂടുന്നുണ്ടെങ്കിലും പതിറ്റാണ്ടുകളായി തുടരുന്ന വീതി മാത്രമാണ് റോഡിനുള്ളത്. മാള കൊടകര റോഡിലേക്ക് ചാലക്കുടിയില്‍ നിന്നുമുള്ള റോഡ് സംഗമിക്കുന്ന ജംഗ്ഷനിലുള്ള മീഡിയനും ഗതാഗത കുരുക്കിന് കാരണമാകുന്നുണ്ട്. ജംഗ്ഷനില്‍ നാല് വാഹനം ഒരുമിച്ചെത്തിയാല്‍ ഗതാഗത കുരുക്ക് രൂപപ്പെടുന്ന അവസ്ഥയാണുള്ളത് .
മാള കെ.എസ്.ആര്‍.ടി.സി യില്‍ നിന്നും 50 ല്‍പ്പരം ട്രിപ്പുകള്‍ മാള തൃശൂര്‍ റൂട്ടിലുണ്ട്. ഇതിനടുത്തുള്ളയത്രയും ബസുകള്‍ മാള ചാലക്കുടി റൂട്ടിലുമുണ്ട്. നിത്യേന നൂറുകണക്കിന് മറ്റു വാഹനങ്ങളും ഇതിലെ കടന്നു പോകുന്നുണ്ട്. കൊടുങ്ങല്ലൂര്‍ മാള കൊടകര റോഡ് ബി.എം.ബി.സി ടാറിംഗായതിനാല്‍ വാഹനങ്ങളുടെ വേഗത കൂടുതലാണ്.
ഗതാഗത കുരുക്കിനിടയിലും വാഹനങ്ങള്‍ക്കിടയിലൂടെ ഇരുചക്ര വാഹനങ്ങളും മറ്റും തിരുകി കയറ്റുന്നതിനാല്‍ പലപ്പോഴും ഗതാഗത കുരുക്ക് ഏറുന്ന അവസ്ഥയുമുണ്ട്. അപകടങ്ങള്‍ക്കുമിത് കാരണമാകുന്നുണ്ട്. അശാസ്ത്രീയമായ ഗതാഗത സംവിധാനത്തിലെ അപാകത പരിഹരിക്കണമെന്നാണ് ഉയരുന്ന ആവശ്യം.