കോഴിക്കോട്: ഇന്‍ഷുറന്‍സ് പ്രീമിയത്തിനും അനുബന്ധ സേവനങ്ങള്‍ക്കും ഏര്‍പ്പെടുത്തിയ 18 ശതമാനം ജി.എസ്.ടി പിന്‍വലിക്കണമെന്നാവശ്യപ്പെട്ട് എല്‍.ഐ.സി എംപ്ലോയിസ് യൂനിയന്‍ ശേഖരിച്ച 22 ലക്ഷം പേരുടെ നിവേദനം പ്രധാനമന്ത്രിക്കു ഇന്നു നല്‍കും.
കേരളവും തമിഴ്‌നാടും ഉള്‍പ്പെടുന്ന ദക്ഷിണ മേഖലയില്‍ 22 ലക്ഷത്തിലേറെ പേര്‍ നിവേദനത്തില്‍ ഒപ്പുവച്ചതായി സംഘാടകര്‍ അറിയിച്ചു. ഇന്‍ഷുറന്‍സ് മേഖലയെ ഉയര്‍ന്ന നികുതി വലയത്തില്‍ കൊണ്ടുവന്ന് ഭാരം വര്‍ധിപ്പിക്കുകയാണു കേന്ദ്രസര്‍ക്കാര്‍ ചെയ്തത്.
ലൈഫ് ഇന്‍ഷുറന്‍സ് പോളിസികളുടെ പ്രീമിയത്തിലുള്ള ഇന്‍ഷുറന്‍സ് ഘടകത്തിനും ആരോഗ്യ ഇന്‍ഷുറന്‍സിനും ഗ്രൂപ്പ് ഇന്‍ഷുറന്‍സ് പദ്ധതികളില്‍ ഉള്‍പ്പെട്ട വ്യക്തികള്‍ക്കുമെല്ലാം ഇതു ബാധകമാണെന്നത് ആശങ്കയുയര്‍ത്തുന്നുണ്ട്.
ജനറല്‍ ഇന്‍ഷുറന്‍സിലും സാധാരണക്കാരുടെ വാഹനങ്ങളുടെ തേര്‍ഡ് പാര്‍ട്ടി ഇന്‍ഷൂറന്‍സിന്റെയും നികുതി നിരക്ക് 18 ശതമാനമായി വര്‍ധിപ്പിച്ചതായും ഓള്‍ഇന്ത്യാ ഇന്‍ഷൂറന്‍സ് എംപ്ലോയിസ് അസോസിയേഷന്‍ വൈസ് പ്രസിഡന്റ് എം. കുഞ്ഞികൃഷ്ണന്‍, എല്‍.ഐ.സി എംപ്ലോയിസ് യൂനിയന്‍ പ്രസിഡന്റ് ഐ.കെ ബിജു,
ജനറല്‍ സെക്രട്ടറി പി.പി കൃഷ്ണന്‍, എം.ജെ ശ്രീരാം വാര്‍ത്താസമ്മേളനത്തില്‍ അറിയിച്ചു.