വടക്കാഞ്ചേരി : 'യുവത്വം ആസ്തികളുടെ പുനര്‍ നിര്‍മ്മാണത്തിന് എന്ന മുദ്രാവാക്യവുമായി സാങ്കേതിക വിദ്യാഭ്യാസ വകുപ്പിന് കീഴിലുള്ള നാഷ്ണല്‍ സര്‍വ്വീസ് സ്‌കീം ടെക്‌നിക്കല്‍ സെല്ലിന്റെ പുനര്‍ജ്ജനി പദ്ധതിയുടെ ഭാഗമായി വടക്കാഞ്ചേരി ജില്ലാ ആശുപത്രി നവീകരിക്കുന്ന തൃശൂര്‍ ഗവണ്‍മെന്റ് എന്‍ജിനീയറിങ് കോളജ് വിദ്യാര്‍ഥികള്‍ക്ക് മന്ത്രി എ.സി മൊയ്തീന്റെ അഭിനന്ദനം. ഇന്നലെ ഉച്ചക്ക് ആശുപത്രിയിലെത്തിയ മന്ത്രി എന്‍.എസ്.എസ് യൂനിറ്റ് അംഗങ്ങളെ അഭിനന്ദിക്കുകയും ഇത്തരം പ്രവര്‍ത്തനങ്ങള്‍ സമൂഹത്തിന് വലിയ മാതൃകയാണെന്നും കൂട്ടി ചേര്‍ത്തു. സംസ്ഥാനത്തെ തിരഞ്ഞെടുത്ത 55 സര്‍ക്കാര്‍ സ്ഥാപനങ്ങളില്‍ നിര്‍ധന രോഗികള്‍ക്കും ആരോഗ്യ വകുപ്പിനും സാങ്കേതിക വിദ്യാഭ്യാസ വകുപ്പിനും തദ്ദേശസ്വയംഭരണ സ്ഥാപനങ്ങള്‍ക്കും ഏറെ പ്രയോജനപ്രദമായ പദ്ധതിയുടെ ഭാഗമായാണ് ജില്ലാ ആശുപത്രിയിലെ തകരാറിലായ 43 ലക്ഷം രൂപയുടെ ഉപകരണങ്ങള്‍ അറ്റകുറ്റ പണി നടത്തുന്ന പ്രവര്‍ത്തനങ്ങള്‍ക്ക് തുടക്കം കുറിച്ചത്. വിദ്യാര്‍ഥികള്‍ക്കാവശ്യമായ മുഴുവന്‍ സഹായങ്ങളും ചെയ്ത് നല്‍കുമെന്നും മന്ത്രി പറഞ്ഞു. നഗരസഭ വൈസ് ചെയര്‍മാന്‍ എം.ആര്‍ അനൂപ് കിഷോര്‍, സ്ഥിരം സമിതി അധ്യക്ഷന്‍ എന്‍.കെ പ്രമോദ് കുമാര്‍, ആശുപത്രി സൂപ്രണ്ട് ഡോ. പി.കെ ആശയും മന്ത്രിയോടൊപ്പം ഉണ്ടായിരുന്നു.