കാളികാവ്: വര്‍ഗീയ വിഷം ചീറ്റുന്ന വ്യാജ വാര്‍ത്തയുമായി പ്രമുഖ ദേശീയ ചാനല്‍. മലപ്പുറം ജില്ലയിലെ കാളികാവില്‍ അവതരിപ്പിച്ച തെരുവ് നാടകമാണ് സീ ന്യൂസ് വര്‍ഗീയനിറം നല്‍കി ഹിന്ദു സ്ത്രീയെ കൊലപ്പെടുത്തുന്നതായി ചിത്രീകരിച്ചത്. മാധ്യമപ്രവര്‍ത്തക ഗൗരി ലങ്കേഷിന്റെ കൊലപാതകത്തില്‍ പ്രതിഷേധിച്ചാണ് നാടകം അവതരിപ്പിച്ചത്. നടു റോഡില്‍ കേരളത്തിലെ ഇടതുപക്ഷ മുസ്‌ലിംകള്‍ ആര്‍.എസ്.എസ് അനുഭാവിയായ ഹിന്ദു സ്ത്രീയെ കൊല്ലുന്നു എന്ന തലക്കെട്ടോടെയാണ് ചാനല്‍ പുറത്തുവിട്ടത്.
വാര്‍ത്ത വിവാദമായതോടെ വാര്‍ത്തയും പടവും ചാനല്‍ മുക്കി. എം.ബി രാജേഷ് ഉള്‍പ്പെടെയുള്ളവര്‍ ചാനലിനെതിരേ രംഗത്തുവന്നിട്ടുണ്ട്. ഡി.വൈ.എഫ്.ഐ കാളികാവ് ഏരിയ സെക്രട്ടറി സി.ടി സകരിയ്യയാണ് നാടകത്തിലെ പ്രധാന വേഷം അഭിനയിച്ചത്. ഗൗരി ലങ്കേഷിന്റെതുള്‍പ്പെടെയുള്ള കൊലപാതകങ്ങള്‍ക്കു പിന്നില്‍ ആര്‍.എസ്.എസ് ആണെന്നാരോപിച്ച് സകരിയ്യ ആക്രോശിക്കുന്ന രംഗമാണ് ചാനല്‍ പ്രധാനമായി എടുത്ത് കാണിച്ചിട്ടുള്ളത്.
ഇന്ത്യയെ മറ്റൊരു സിറിയ ആക്കാന്‍ അനുവദിക്കണോ എന്ന ചോദ്യവും സീ ന്യൂസ് ഉന്നയിക്കുന്നുണ്ട്. ജന്മാഷ്ടമി ദിനത്തിലും കേരളത്തിനെതിരേ ചാനല്‍ കൊടും നുണയുടെ വിഷം ചീറ്റുകയാണെന്ന് എം.ബി രാജേഷ് ഫേസ് ബുക്ക് പോസ്റ്റില്‍ കുറിച്ചു. മാപ്പു പോലും അപേക്ഷിക്കാതെ ചാനല്‍ വാര്‍ത്തയും പടവും പിന്‍വലിച്ചതിന് പിന്നില്‍ ചാനലിന്റെ ഗൂഢലക്ഷ്യമാണ് വ്യക്തമാക്കുന്നതെന്നും രാജേഷ് കുറ്റപ്പെടുത്തി.