കൊച്ചി: സ്വര്‍ണക്കടകളിലെന്നപോലെ ഹോട്ടലുകളിലും നികുതി വകുപ്പ് ഉദ്യോഗസ്ഥരുടെ പരിശോധന വരുന്നു. നിലവില്‍, ആരോഗ്യവകുപ്പ് ഉദ്യോഗസ്ഥരും ഭക്ഷ്യവകുപ്പ് ഉദ്യോഗസ്ഥരുമൊക്കെയാണ് ഹോട്ടലുകളില്‍ പരിശോധന നടത്താറ്. എന്നാല്‍, ചരക്കുസേവന നികുതിയുടെ മറവില്‍ഹോട്ടലുകളില്‍ ഭക്ഷ്യവസ്തുക്കള്‍ക്ക് വന്‍തോതില്‍ വില വര്‍ധിപ്പിച്ചുവെന്ന വ്യാപക പരാതിയുടെ അടിസ്ഥാനത്തിലാണ് നികുതി വകുപ്പ് ഉദ്യോഗസ്ഥരും പരിശോധനക്ക് ഇറങ്ങുന്നത്.
കഴിഞ്ഞ ദിവസം സംസ്ഥാന ധനമന്ത്രിയുടെ അധ്യക്ഷതയില്‍ ചേര്‍ന്ന നികുതി വകുപ്പ് ഉദ്യോഗസ്ഥരുടെ യോഗത്തിലാണ് ഇതുസംബന്ധിച്ച് ധാരണയായത്. ഹോട്ടലുകളുടെ മൊത്തം വിറ്റുവരവ്, ബില്ലടിക്കുന്ന രീതി, ജി.എസ്.ടി രജിസ്‌ട്രേഷന്‍ ഉള്ള ഹോട്ടലുകളാണോ ബില്ലില്‍ 18 ശതമാനം നികുതി ഈടാക്കുന്നത്, നേരത്തെയുണ്ടായിരുന്ന വിവിധ നികുതികള്‍ കുറച്ചതിനുശേഷമാണോ പുതിയ നികുതി ഈടാക്കുന്നത് തുടങ്ങിയ കാര്യങ്ങളാണ് പരിശോധിക്കുക.
ജി.എസ്.ടി നിലവില്‍ വന്ന ദിവസം മുതല്‍തന്നെ പരാതി ഉയര്‍ന്നത് ഹോട്ടലുകളിലെ ഭക്ഷ്യവസ്തു വില വര്‍ധന സംബന്ധിച്ചായിരുന്നു. ചായ മുതല്‍ ബിരിയാണി വരെയുള്ള ഒട്ടുമിക്ക ഭക്ഷ്യവസ്തുക്കള്‍ക്കും അന്നുമുതല്‍ ഒറ്റയടിക്ക് 20 ശതമാനംവരെ വില വര്‍ധിപ്പിച്ചിരുന്നു. ഹോട്ടല്‍ ഭക്ഷണത്തിന് 18 ശതമാനം നികുതി ഈടാക്കാന്‍ ജി.എസ്.ടി നിയമത്തില്‍ അനുമതി നല്‍കുന്ന വ്യവസ്ഥയനുസരിച്ചായിരുന്നു ഇത്.
പ്രതിഷേധം വ്യാപകമായതോടെ, അധിക വില ഈടാക്കുന്ന ഹോട്ടലുകളുടെ ബില്ലിന്റെ കോപ്പി അയച്ചാല്‍ നടപടിയുണ്ടാകുമെന്ന് ധനമന്ത്രി പ്രഖ്യാപിച്ചു. ഇതനുസരിച്ച് നിരവധിപേര്‍ ഹോട്ടല്‍ ബില്ലിന്റെ ഫോട്ടോ ധനമന്ത്രിയുടെ ഫേസ്ബുക്ക് പേജിലുംമറ്റും അപ്‌ലോഡ് ചെയ്തിരുന്നു. എന്നാല്‍, നടപടിയൊന്നുമുണ്ടായില്ല. ഭക്ഷണവില വര്‍ധന സംബന്ധിച്ച് പരാതി വ്യാപകമായ സാഹചര്യത്തിലാണ് നികുതി വകുപ്പ് ഉദ്യോഗസ്ഥരുടെ യോഗത്തിലും ഇക്കാര്യം വിശദമായ ചര്‍ച്ചയായത്.