ന്യൂഡല്‍ഹി: ഇന്ത്യന്‍ ക്രിക്കറ്റ് മുന്‍ ക്യപ്റ്റന്‍ മഹേന്ദ്ര സിങ് ധോണിയെ പ്രശംസകളാല്‍ മൂടി ടീം കോച്ച് രവി ശാസ്ത്രി. ധോണിയില്ലാത്ത ഇന്ത്യന്‍ ടീമിനെ കുറിച്ച് ചിന്തിക്കാനാവില്ലെന്നും 2019 ലോകകപ്പില്‍ ധോണി തിരിച്ചു വരണമെന്നും അദ്ദേഹം അഭിപ്രായപ്പെട്ടു. അന്താരാഷ്ട്ര മത്സരങ്ങളിലെ ധോണിയുടെ ഭാവിയെ കുറിച്ച് യാതൊരു സംശയവുമില്ല.  ഇപ്പോഴത്തെ അദ്ദേഹത്തിന്റെ ഫിറ്റ്‌നസ്സ് മുന്‍ നിര്‍ത്തി അദ്ദേഹത്തെ ടീമില്‍ നിന്ന് മാറ്റി നിര്‍ത്താനാവില്ലെന്നും അദ്ദേഹം കൂട്ടിച്ചേര്‍ത്തു.   

ധോണിയെ സുനില്‍ ഗവാസ്‌കര്‍, സചിന്‍ ടെണ്ടുല്‍ക്കര്‍, കപില്‍ ദേവ് തുടങ്ങിയ പ്രമുഖരോട് ഉപമിച്ച രവി ശാസ്ത്രി അദ്ദേഹത്തിന്റെ നേട്ടങ്ങല്‍ ആദരിക്കപ്പെടേണ്ടതാണെന്ന് ചൂണ്ടിക്കാട്ടി. ധോണിയെ പൊലെ ഒരു പ്രതിഭയെ നിങ്ങള്‍ക്ക് എവിടെയെങ്കിലും കാണാനാവുമോ- രവി ശാസ്ത്രി ചോദിച്ചു. ഇനിയും ധോനിയില്‍ ഒരു പാട് പുറത്ത് വരാനുണ്ട്- ശ്രീലങ്കന്‍ പര്യടനം ചൂണ്ടിക്കാട്ടി അദ്ദേഹം പറഞ്ഞു. ഇന്ത്യ കണ്ട ഏറ്റവും നല്ല വിക്കറ്റ് കീപ്പറാണ് ധോണിയെന്നും അദ്ദേഹം കൂട്ടിച്ചേര്‍ത്തു.